En Turkiya tenemos el mazal de ser un payiz ke tyene mares en tres vandas. I en la mar Ege ke se topa entre la Turkiya i la Gresya tenemos syenes de lugares ande los motores i los yates tyenen la posibilidad de topar lugares para una mar maraviyoza. Mizmo si oy en diya el puevlo se ambezo ke no devemos de ensuzyar la mar, echimos bastantes chopes anyos i anyos a la mar.
En mi chikes, kuando teniya apenas 5-6 anyos, me akodro ke mos ivamos a Florya a la plaj i antes mi madre i mis tiyas aparejavan komidas. No me olvido de las borekas de berendjena ke komiyamos kon uvas sin kueshkos.
Ensima de la mar aviya un kamino formado de tavlas i syertas kabinas ensima. I mos asentavamos en el bodre de este kamino. Antes ke mi padre merko una araba mos ivamos kon el treno de Sirkeci. Ma en el 1961, teniyamos una araba Opel. I para ir a la mar empleavamos la araba. Mos ivamos muncho a Kilyos. Kuando era chiko toda la mishpaha (los tiyos i los paryentes) moravamos los enveranos en Tarabya.
Dospues kuando empesimos a ir de muevo a Tarabya, mi padre no lavorava los diyas de djueves i los djueves i shabat mos ivamos a Kilyos. Era muy ermozo. Alkilavamos una kabina grande i komiyamos mizmo aya.
Agora estamos en la Ada, en la Büyükada. Este anyo kreo ke todos estan kontentes porke la mar esta limpia. Mizmo la grande plaj de la Munisipalidad d’Estanbol ke se topa serka de Aya Nicola tyene una bandyera blu. Esto kere dizir ke la mar esta muy limpia. I kada diya syenes de personas estan vinyendo de Estanbol para entrar a esta mar.
Oy en diya en la Büyükada ya puedesh entrar a la mar de todas las partes. Para los ke moran en la Izla es un grande plazer.
Kreo ke la djente empeso a entender ke van a tener una mar limpia si reelmente azen atension a todo modo de kozas en sus vidas.
