Komo de uzo un evenimyento relatado al mez koryente…
La istorya de los Djudios en Evropa: se puede kaji dizir ke es komo una kronolojiya de ekspulsiones. En un tyempo o otro, los Djudios fueron ekspulsados o se les fue defendido de establesersen en kaji todos los paizes de la Evropa, tanto en el este komo en el oeste.
Si byen la ekspulsion de la Espanya en 1492 es la mas famoza, la mas konosida, la ekspulsion de los Djudios de Inglaterra fue una de las ekspulsiones legales la mas larga de las ke fueron enrejistradas en la istorya. El Edikto de Ekspulsion fue emitido por el Rey Edward I el 18 de Julyo de 1290 (2 Av 5050) i este edikto no fue alevantado de la aplikasyon asta 1656 (aunke de vez en kuando se permityo a syertos Djudios individuales vijitar el paiz, myentres ke otros entravan komo konversos, Djudios ke se retraktavan publikamente de la kreyensa Djudia i adoptavan el Kristianizmo para fuir de la Inkizisyon Espanyola).
Kuando i komo los Djudios se establesyeron en la Ingleterra?
Djudios biviyan en la Inglaterra en la epoka romana i anglosaksona (80-1066), ma no teniyan una komunidad organizada. Kuando William el Konkistador suvyo al trono de la Inglaterra en 1066, envito a los komersantes i artizanos Djudios del norte de Fransya. Los Djudios vinyeron prensipalmente de la Fransya i syertos de Alemania, Italia i Espanya, todos bushkando una prosperidad i refujyo kontra el antisemitizmo. Estos Djudios, ke sirviyan komo reprezentantes spesyales del rey, lavoravan komo faizdjis. Despues de una jenerasyon, los Djudios establesyeron komunidades en Londra, York, Bristol, Canterbury i otras sivdades importantes. Jeneralmente biviyan solos en areas segregadas. Ma solo en 1177 se les permityo la enstalasyon de un semeteryo Djudio en Londra.
En 1217, los Djudíos inglezes fueron ovligados a meter insinyas amariyas. En 1253, se emityo un dekreto ke defendiya a los Djudios de bivir en sivdades ke no teniyan una komunidad Djudia establesida. En 1255, los Djudios fueron akuzados de libelo de sangre.
Munchos istoryanos dizen ke la mayoriya de las ekspulsiones en la Evropa tuvyeron, en el fondo, un insentivo finansyero. En la mayoriya de los kavzos, a los Djudios ekspulsados se les defendiya yevarsen sus rikezas, i sus posesyones abandonadas enrikesyeron enormamente la korona. En el kavzo del rey Edward I, los insentivos finansyeros fueron minimal. Los Djudios de Inglaterra aviyan sido proves por los impuestos spesyales para eyos i por el Edikto de los Judios de 1275, ke les defendiya todo modo de prestamyento de moneda, ke era una okupasyon primera para los Djudios. El estatuto tambyen ordenava otras enterdiksyones antisemitas, komo restriksyones de morar en syertos lugares i una ley ke ovligava a los Djudios a meter una insinya amariya. Si bien el Estatuto de los Djudios (el Estatuto de 1275 fue nomada ansi) teniya komo buto de enkorajar a los Djudios a lavorar en otras profesyones, la povlasyon lokal no era partizante a ke los Djudios avansen en sus ofisyos.
El selo relijyozo kristiyano i las manevras politikas tambyen fueron motivos importantes para las ekspulsiones en la Evropa. Edward ya aviya partisipado en una kruzada en la Tyera Santa i estava apoyando politikamente otra kruzada. Los eruditos de Shakespeare egzaminan en jeneral el Edikto de Ekspulsyon tambyen. Despues de todo, si no biviyan Djudios en Inglaterra, de ken se enspiro Shakespeare por su infamozo Shylock? Una demanda difisil a responder…
