La grandeza de una nasyon se djuzga por la forma de tratar a los animales. Mahatma Gandhi
El simbolo de un paiz, es el refleto del karakter de este paiz. Las reushitades de su istorya, la kreensya de la relijyon, la lokalizasyon jeografika, las mijores karakteristikas de la sosyeta, son emportantes para eskojer el simbolo ke reprezenta el paiz.
El simbolo de la kultura Kanadiense es el Kastor.
Una perioda el komersyo de pieles (post) de kastor, izo ganar munchas paras a Kanada, i el kastor fue el simbolo del paiz.
Los kastores son muy laboryozos i son kalmos. Se topan en todas las sivdades de Kanada.
El simbolo de la kultura Turka es el Lovo Grizo (bozkurt). Komo kontinuasyon de sus tradisyones istorikas turkas, estan utilizando el lovo grizo komo simbolo animal desde el pasado.
El simbolo de la kultura rusa es el Lonso.
Eskojyeron este animal porke reziste a las kondisyones duras, sovre todo porke se adapta a las kondisyones jeografikas i fizikas difisiles.
El simbolo de la kultura franseza es el Gayo.
Spesyalamente se uza en las kompetisyones sportivas. Los fransezes tambyen adjustaron karakteristikas mitolojikas i lejenderyas al gayo porke, el gayo kada demanyana kon el sol empesa a kantar kukuriko i mos anunsya la fin de la eskuridad.
El simbolo de la kultura amerikana es la Agila. Es un animal feros, ke se enkontra muncho en la jeografiya amerikana. En una gerra, un soldado amerikano mostrando la agila disho: Esta bolando por muestra Liberta. Este modo se izo el simbolo del paiz. Es un animal ke no nesesita a dingunos i bive solo. Kon los pelos blankos reprezenta la pureza i la klaredad.
El simbolo de la kultura espanyola es el Toro.
La tradisyon de toreo del paiz eksplika la seleksyon de este animal. Los Toros no son animales agresivos. Kuando salen a la arena, la kavza ke son muy feroses es las aplikasyones ke les azen antes dos dias. Los matadores ke toman en la mano los chales kolorados inyervan los toros i los eksitan. Eyos se azen agresivos.
El simbolo de la kultura ingleza es el Leon.
El simbolo de tres leones es: dar el espanto a los enimigos antes la gerra, inspirar la solidarita entre las trupas.
Richard the Lion heart formo una taktika famoza, ke lucho kontra las sivdades muzulmanas. El rey I. Richard utilizo los tres leones komo simbolo ofisyal. Oy, todas las seleksyones de futbol de Ingleterra kuentan kon tres figuras de leones.
El simbolo de la kultura ekoseza es: un Kavayo kon un Kuerno. En la mitolojiya urbana, el kavayo kon un kuerno, era un simbolo de pureza, i inosensya, asi komo de maskulinidad, poder i kavalyeros.
El simbolo de la kultura Nueva Zelanda es: El Pasharo de Kivi. Los pasharos de Kivi son nativos de este paiz, no pueden bolar, ma despues de munchos siglos, por primera vez empesaron a pasear de muevo por las kolinas vedres de la kapitala Wellington. Son muy pokos i por esto empesaron un proyekto para salvarlos i para reaktivar la povlasyon de los pasharos kivis.
Los animales i las yervas, son los bivos kon los ke partajamos este mundo. Si no protejamos los animales, si no los keremos byen, si no respektamos sus derechos a la vida, no tenemos la shans de bivir en este mundo.
"No me konfio a la djente ke no keren byen a los perros, ma si un perro no kere byen a una persona, me konfio a los sentimyentos de este perro".
Albert Einstein.
