La semana pasada eskrivi sovre las eleksyones en los payizes Evropeos. Ma es noche de alhad ke el prezidente Amerikano, Joe Biden dyo a la fin karar, kon el apoyo de su mujer, ke no va partisipar a las eleksyones ke se van a realizar en el mez de Novembre. No so un partizante de Donald Trump, ma reelmente no estava achetando la kanditatura de Joe Biden, por sus problemes de salud. Ya lo vimos ke estava tomando la inisyativa para asentarse en una shena ande no se topava una siya, o de tomar la mano de una persona ke no se topa en la shena. Biden era un ombre kapache; ya savemos ke en los Estados Unidos el prezidente no es el ke dirija el payiz. El es la vitrina de la direksion i de la politika. Ma kale dizir ke munchas personas no kijyeron una vitrina asemejante. La arkitekta de este akto fue la mujer de Biden, la sinyora Jill Biden. Dospues ke Jill acheto ke no sea prezidente, Joe Biden eskrivyo una letra ande anunsyo su demision.
Kualo vamos a ver agora. Vamos a ver a Donald Trump kon su oreja burakada i kon sus simpatizanos ke tyenen un bandaj en sus orejas.
Trump esta muy kontente agora porke va kombatir kon Kamala Harris, la primera mujer preta (no es muy fasil de dizir ke es negra) i orijinaria de los payizes Asiatikos. No era muy poderosa durante la prezidensia de Biden. Ma dizen ke esto es el poder del vise prezidente.
Biden pyedro el poder kon la diskusion ke topo lugar en la television. Esta vez vamos a ver lo ke va pasar en la diskusion entre Donald Trump i Kamala Harris. Esto va ser muy emportante para los dos. No savemos la kapachidad de Harris. Trump era muy komodo kontra Biden, ma no va ser la mizma koza kontra Kamala Harris.
Esto esperando ke dospues de las eleksyones los Estados Unidos van a lavorar por la pas en el mundo.
