İvan Moscovich nasyo en 1926 en Novi Sad, una sivdad de Yugoslavya de akel tyempo. Sus padres djudyos eran de Ungriya. Su fama vyene ke invento munchos djugos, djugetes pedagojikos ke mizmo oy se konsideran pozitivos. Muryo el anyo pasado, en 2023, a la edad de 96 anyos.
Fue internado en 1943 a Auschwitz, Bergen-Belsen i mas dos campos. Sovrebivyo a la fin de la gerra, bivyo un syerto tyempo en Sueka para restableserse, termino sus estudyos en la universidad de Belogrado i se fue a bivir a Israel.
A los 95 anyos izo una ekspozisyon de arte en el Muzeo Nasyonal de Matematika en Nueva York. Las figuras se izyeron mekanikamente i kon reglas de matematika.
Ovras de arte ke se izyeron en kolaborasyon entre el ombre i la makina. Es ke estas ovras se izyeron a traves de una makina inventada por Ivan Moskovich yamada “Harmonographe” i ke el mizmo era profundamente atado al arte de las Matematikas.
Una partikularidad importante de esta makina es ke ninguna figura no se parese, kada una i una es independente. Este interes de Ivan Moskovich por el arte de las matematikas parese un poko raro; porke las matematikas mos ayudan a analizar i a klasifkar kon presizyon todo lo ke egziste. Ama el arte sigun el Prof. Marshall McLuhan (Un Djudyo de Kanada ke aviya previsto el internet 30 anyos antes ke fue deskuvyerto) es de produsir todo lo ke se puede azer.
En Israel lavoro komo bushkador de siensya i en 1964 fondo el muzeo de "Siyensya i Teknolojiya” en Tel Aviv. Mizmo ke este muzeo no bivyo muncho tyempo, izo ke se avran muzeos de siensya en el mundo entero komo el “Exploratorium” de San Fransisco i el “MoMath” de Manhattan. A parte de este famozo sentro, sus ovras dekoraron los muzeos de Berlin, de Londra i munchas otras kapitales. Grasyas a estas ekspozisyones, las jenerasyones de oy ke no estan muy konsiyente del Olokosto, se estan enteresando en este sujeto, mas i mas a traves de estos sobrebivientes ke kedaron tan pokos. Sus ovras enteresaron kaji todo el mundo, desde los ijikos de 4 anyos asta los de 104 anyos. Moscovich dize ke “es una koza rara ke las matematikas, la siensya i el arte ke se mesklen de una manera tan armonyoza”.
Su estreya briyo kuando estuvo en un restorante chinezo de Los Andjeles, komyendo por savor de boka un biskui ande se topava un papeliko kon su konsejo ke le diziya: "vende tus ideas, porke sin ninguna duda ya se akseptan”. Fue ansi ke empeso a inventar djugos i djugetes bazados sovre las matematikas, la siensya i el arte. Ama no olvida de adjustar dizyendo “Todo esta atado en la vida. Si no estuvyera en Auschwitz o en Bergen-Belsen o en los otros kampos, i si no tuvyera la esperansa, un buto para bivir, no se si seriya el mizmo Moscovich. Los mizmos semptomes ke tuvo Primo Levi i ke despues la gerra se suisido a los 43 anyos, los tuve i yo. Ama yo me salvi porke teniya menester de esbafar i esto me izo ser un inventor.”
