El Reynado Judyo de los Hazares se puede konsiderar komo una ermoza istorya de lejenda. Este Reynado tuvo una egzistensya de 2000 anyos i despues de ser konvertido al Judaizmo, se enstalo en el Sud-Este de la Rusia. Para entender la istorya de los Hazares kale tornar a sus orijines. Los Hazares son de orijina Turka; un trivo nomad ke de vez en kuando se mesklo kon los Judyos de Persia, a los Ermenis i otros trivoz nomades. En el 8en siglo, parvinyeron a abatir los inimigos ke keriyan konkistar sus tierras yenas de produktos rikos. Eyos salvaron kon eroizmo sus teritoryos, Itil, sus kapitala. Fasta 740 los Hazares adoravan i rogavan a Idoles. En esta data sus Rey, Bulan desidyo de konvertirse a una de las 3 Relijiones de la Evropa (El Kristyanizmo, el Islam i el Judaizmo). Yamo emisaryos reprezentantes de estas 3 relijiones a su Reynado. El Rey keryendo atarse al monoteizmo envito a los 3 lideres relijiozos a diskutir entre eyos para pueder tomar la mas djusta desizyon. El Rey se entreteno tambien kon kada uno de eyos i fue konvensido ke el Judaizmo es la relijion i la Ley la mas djusta i en poko tyempo, el Rey i el entorno i todo el puevlo adopto la relijion de Avraam. Siendo el Lider del Islam penso i disho ke en komparezon al Katolisizmo, el Judaizmo es mas apropiado i el Lider Katoliko deklaro ke enfrente de otras kreyensas, el Judaizmo es el mas djusto. Ansi el Judaizmo se izo la relijyon ofisial del Reynado de los Hazares.
Esta konseja verdadera fue eskrita kon todos sus detalyos por Yehuda Hallevi, en su ovra bien konosida, El Kuzari, en lingua Araba. De otra parte savemos ke otros detalyos fueron dados por el Rey Yosef a el onorado Ibni Shaput en el anyo 960 de Espanya kontando la konversion al Judaizmo i el nombre de los Reyes ke suvyeron al trono de los Hazares Aaron, Binyamin, Menahem… Sus atadijos al Dyo de Israel, sus atadijos a muestra Tora, sus eskritos, sus orasiones i nostaljiya de Yerushalayim, i la esperansa de la Geula para todos los Judyos. El paiz de los Hazares era muy riko, bien ke la klasa aristokrata aviya adoptada la relijyon Judiya, no mankavan de dar los mizmos derechos a otras relijiones. En este Reynado se apliko todas las Leyes, la manera de bivir, las kreyensias, las fyestas fasta el mas chiko detalyo… Ma su rikeza i su prosperita fue en mizmo tyempo su pyedrita… Los Rusos teniyan ojos enriva de el i lo atakaron kon grande fuersa, una gerra de 3 anyos en 966-969 ke se eskapo kon la piedrita de los Hazares i su kapital, Itil paso a las manos de los Rusos i los Gregos. En 1016, el paiz entero paso a los inimigos, lo mas de Hazares se mesklaron a la populasion lokal, otros se ataron a los Judyos de Espanya ande emigraron i se mesklaron a la populasion Sefaradi todo en guadrando el amor i el suvenir del destino briyante de los Hazares ke parese komo una lejenda istorika, ke kedo en el tino de todos. Miles de eskritos istorikos i romansos mos kontan la egzistensya del Reynado Judyo de los Hazares. Oy diziendo ke la populasion Judiya de la Evropa santral es vinida de los Hazares, munchas lejendas se atan a esta epoka de muestra istorya ke se puede asemejar a un omaje de fadas.
