Büyükada i las otras islas son lugares de kampanya. Un atmosfer kalmo. Las kazas antiguas de tavla, las guertas, las kalejas kon arvoles i flores i siguro la mar limpya. Asta unos kuantos anyos antes el solo medio de lokomosyon eran los faytones i las arabas kon kavayos. Aviya solo un otomobil de la polisiya, una ambulansa, unos kuantos kamyones de bomberos i puede ser unos kuantos kamyones de la munisipalita para kavzos urjentes. Los moradores se munchiguavan en enverano. Todos se konosiyan i todos eran orozos. Se abashava a la eskala a bever un chayiziko. En el empesijo del enverano kuando se abashava del vapor, todos teniyan la kara riyente, se dava saludos a los botikaryos ke ya se konosiyan de anyos. Se saludavan tanbien kon los ke estavan asentados en los kafikos del bodre de la mar.
No se komo salyo una moda ke todos los turistos ampesaron a vinir i ver estas izlas, sovre todo la Buyukada. No se yama vinir, se yama atake. Los ke konduizavan las karosas, para ganar mas muncho, metiyan 5-6 personas al lugar de 4 i los kansavan a los kavayos en las kalores del enverano, asta ke unos kuantos muryeron de la kanserya. Sovre esto, las organizasyones de los amantes de animales ampesaron a azer demonstrasyones, asta ke la munisipalita alevanto por entero estos faytones. Kaliya meter alguna koza para los ke moran i para los turistos. Ke izieron? Metyeron taksis ke lavoran kon elektrisita. No estava abastando, metyeron i midibuses ke lavoran kon elektrisita. Esto no esta puedyendo dar el atmosfer de las Izlas. Este anyo metyeron i unos otobuses enormes ke no estan kavyendo en las kalejas estrechas de la isla.
Los moradores ampesaron a merkarsen motorsikletas kon elektrisita, de dos personas o tres. Ya estava muy bueno para los aedados. Los proprietaryos de estos motorikos ampesaron a transportar personas. I todos estavan kontentes al empesijo. Komo todo, i de esto le salyo la golor. De una parte los taksis, los otobuses, los turistos ke vienen a ambezarsen a suvirsen en las bisikletas, i estos motorikos izieron en las kayes un kaos ke no se puediya kaminar repozado.
Agora Lunes, oyimos ke la munisipalita i la polisiya estava arekojendo todos los motorikos ke estavan parkados en las kayes i mizmo los ke estavan de aryento de las guertas.
Mi marido este anyo no esta puedyendo kaminar muncho por ke tuvo empesijo de Parkinson. De sorte ke aparte ke tiene un baston de una parte, kale ke se detenga i de alguno por la otra parte. Estavamos muy kontentes kon estos motorikos. Agora kedimos aprezados en kaza. Disheron ke a los aedados de 65 anyos i mas, ya ay permisyon de sirkular kon estos motorikos, ma si el motor les apartiene. Mozotros no tenemos motoriko. I ke vamos azer no se save. Telefonamos a los taksis, todos estan okupados kon los turistos. Los otobuses no pasan por las kalejas, solo por las kayes prensipalas.
Kurto, a poko a poko, mos kitaron la savor de las izlas.
