En 1953 se fue la ermana de mi mama a Paris a ver sus tres tiyas i sus famiyas. En lo ke torno, ampesaron a eskrivirsen kon el primo. Estas letras los aserko muncho, nasyo un amor i a la fin desidaron de kazarsen. Todo estava muy bueno, se aparejo el ashugar, se metyo todo lo ke es menester i siguro lo ke no ay de menester. Se incheron dos baules yenos. Fostanes, manteles, tapetes i munchas kozas mas.
Akel tiempo yo era chika i me iva a la eskola. Djusto una semana antes de salir a viyaje, me hazineyi kon sarampion, i despues les apegi a mi ermanika i tanbien a mi tiya, ke no lo aviya pasado en lo ke era chika. Yo i mi ermanika mos alevantimos despues de una semana kaje, ma mi tiya, la povereta, lo paso muy muy pezgado. Se apego a la kama, ni komer ni bever kon una kayentura fuerte. Kuando le paso, estava muy muy flaka, del puerpo i de fuersas. Asperimos no me akodro kuanto tiempo i a la fin desidaron mis paryentes de salir a kamino. El mez era Disiembre. Akel tiempo no se viyajava kon aviones. Mas muncho era kon vapores. Sovre todo ke teniyamos i baules i chantas i validjas.
Mos suvimos al vapor ke se yamava Tarsus. Para akel tiempo un era vapor muy moderno. Mos dieron una kamara de 4 personas. Mi mama, mi tiya, mi ermanika i yo. Muy konfortavle, kamareta de echar i salon kon todo djusto. Ya mos embarkimos del porto de Galata. El diya kaminavamos ande se aserko el vapor i la noche tomava kamino kuando durmiyamos. No me esto akodrando munchos detalyos ma me parese ke en primero akostimos a Pirea. Aya estava yeno de papazes kon vistidos pretos i kon mangas largas i anchas. Mi mama mos enkomendo: Mirá, no vos aleshesh de mozotros porke los papazes pueden yevarvos en enkashandovos aryento de sus mangas anchas. I mozotos del espanto no mos despegimos de la fusta de mi madre. Despues era me parese Napoli. Aya estava muy ermoza i alegre una sivdad. Los vendedores en las kayes. Ma muy pezgada djente. Se apegavan para vender una koza i no deshavan la yaka asta ke le merkes alguna koza. Estava un viyaje de esfuenyo, asta ke salimos de Napoli… Ampeso una furtuna, una furtuna muy fuerte ke no estavamos puedyendo kedar en pies. Mi tiya i mi mama se hazineyaron muncho ma mozotros estavamos muy kontentes ke mos estava paresyendo ke mos estavamos kunando. No estavamos puedyendo ir al salon de komer. El kamarot mos trayiya todo asta la kamara. Imajinavos ke el kamarot estava atado kon una sentur a las baryeras ke se topavan en las paredes para no kayersen, i tanbien no kayersen a la mar. Porke la agua de la mar, las olas estavan entrando por la punta del vapor i estavan saliendo por detras. El kamarot mos estava dando pasensya: No vos espantesh, este vapor es muy rezistente. A ken oyes? Mozotros estavamos ke ya mos estamos aogando otrun poko.
Esta furtuna sin komer i sin bever, de no pueder avrir el ojo, sureyo asta ke mos aserkimos i mos akostimos a Marsilya. Tuvimos i un poko de rotar. Ya mos estavan asperando.
Komo dizen ensima del gató i un poko de kaymak, mos suvimos al treno. Ya estavamos meneyandomos, i el treno fue por savor de boka. Mos meneyimos i aya un diya entero porke no aviya trenos rapidos. Kuando abashimos i mos fuimos a la kaza de mi tiya dos diyas no mos pudimos espertar de la kanserya. Esto fue una kruaziyera inolvidavle. Komo “El gozo de Karagöz en Yalova”.
