Antes dos diyas, uvo una luvya no vos puedo kontar; mabul, mabul, ni la nariz no puediyas kitar ahuera. Por esto estava en kaza, kualo azere, kualo azere, en pensando me kedi durmyendo, komo dizimos shekerleme (durmir kurto) es muy ermozo.
En durmyendo empesi a pensar en los anyos de 1970-73, ke me engrandesi kon una kultura diferente, Grego, Ermeni, Musluman, Djudyo endjuntos mos engrandesimos, diferensya kualo es no saviyamos. En enverano la kampanya muestra era Büyükada, akel tyempo mos plaziya los enveranos, porke aviya muncho kaminar. Mi padre, ke este en ganeden, mos yevava 2 vezes a las vakansas, teniya valor las paras, akel tyempo kaji todos eran esnafikos; los rikos se amostravan kon dedos, solo el lavoro de los padres ya abastava para mantener a la famiya toda, no komo agora. Akel tyempo para vakansas la moda era Erdek, Çınarcık, Avşa, i Marmara adası. De una semana antes empesava la emosyon, i aparajear validjas i validjas, porke mos kedavamos en las pansyones. En las validjas aviya kave, asukar, konservas, aziya de kaza dolmas yenas de pipirushka mi madre, i borekas, biskochos, un chiko odjak para kozer kave, i un bokal de ispirto para asender el odjak. Las pansyones eran al lado de la mar; teniyan delantre komo una lodja un balkon, u enfrente de la mar kon balkoniko, pasavamos un kamino para entrar a la mar. 3-4 famiyas ivamos endjuntos a las vakansas. La famiya muestra eramos komo pishkados; mos plaziya muncho la mar, por esto la demanyana mos alevantavamos muy presto, a las 6-6.30 ya estavamos en la mar. Kuando tornavamos de la mar mi madre kon el odjakito aziya un kave para eyos kon borekitas. Kuando se alevantavan los amigos, los grandes saliyan a empleyar para dezayuno. En los lugares aviya grandes guertas kon arvoles.
Fresko, fresko vendiyan chay, kave, ayran i aya aziyamos dezayuno, i dospues a la mar. No aviya muncho komo oy restoranes, unas chikas barakas de kyoftedji, u gyozleme kon espinaka, u kon kezo, mantidji (chikitikos masa kon sarsicha aryento), borekchis; este modo lugares aviya. En vezes las demanyanas, los padres endjuntos se ivan a la eskala porke viniyan los balukchis de la peshka, i tomavan pishkados i de aya entendiyamos ke a la noche aviya djumbush. En las pansyones aviya un mupak para todos, i las mujeres empesavan aparejar para la noche, los padres se metiyan a djugar vidolu tavli, i mozos kayikchi balata, pishkadikos a la mar. En un diya mos aziyamos kon todos amigos porke akel tyempo eran todos benadam, aviya amistad, aviya respekto, no aviya benefisyo muncho. I kuando estavamos tornando, kale ke se tomara unas kozas, u vino, u myel, u un kolye regalo, para dar a los vizinos. De este modo de una kultura vinimos.
I me esperti kon una boz, te kozere un kave, i la luvya se kalmo; este 15 puntos de shekerleme KE ERMOZO KE ESTAVA... Abrasos
