Ay dos mezes ke estamos aziendo esforsos para pueder publikar un livro de komidas Djudias sovre Çanakkale, sivdad ande bivyeron bastantes Djudios durante munchos siglos. Berta Penso, orijinaria de Çanakkale, nasio i se engrandesio en esta sivdad. Vino a Estanbol dospues ke se kazo. Su marido era i el Çanakkaleli. Para tomar fotografias de las komidas, Berta lavoro un anyo entero i gizo todas estas komidas. I muestros amigos, Rubi Asa, Tania Sisa i Alberto Modiano fotografiaron estas komidas. Devo de rengrasiar a İsak İzi Gormezano, a Sevim i Mois Kohen i a Livyo Zakuto por sus apoyo materyal.
Kero rengrasyar a Gila Erbeş por sus esforsos. Es Vivian Kohen ke realizo la traduksyon en inglez. I es Karen Şarhon ke lavoro para realizar la edisyon en Inglez. Bella Parlakşimşek lavoro para el dizenyo de este livro. Es noche de vyernes ke me fui a la imprimeria para tomar los primeros livros. No estavan dainda prontos. Asperi buen karar de tyempo para tomar a lo manko 25-30 deyos. No pensi ke me puediya ir a la Ada sin los livros. Pensi el dezespero de Berta si me iva sin los livros i asperi. Es diya de shabat ke le di en la plaj del Klub. Estava muy kontente. I vendyo todos los livros ke le trushe. Es esta semana ke le va embiyar una mueva partida. El nombre orijinal del livro es: “Çanakkaleli Berta’nın Mutfağı - Berta’s Çanakkale Cuisine”.
El livro me plazyo muncho. Ma no so yo el ke va dar karar. Son los ke van a merkar estos livros. Vamos a topar esta repuesta en unas kuantas semanas. Berta va partisipar a un reportaje el 17 de Novembre si vamos a realizar “El Diya de la Kultura Djudia Evropea”. Antes de este diya keremos organizar un diya en el Muzeo Djudio ande va firmar sus livros…
Puedesh merkar este livro en el Muzeo Djudio, en el sitio de internet del Sentro Sefaradi (www.istanbulsephardiccenter.com) o en el Şalom verso la fin de esta semana. El presyo es 500 liras.
