Ay maz de 10 anyos ke se izo moda de ir a la Gresya. A las islas, a Atena, a Halkidiki o a Salonika. I mozotros mos fuimos a Salonika; izimos un viyaje muy ermozo. Si keresh vos kontare el program ke izimos i puedeser si vos plaze vos vash i azesh el program komo mozotros. Kaji 9 o 10 oraz es el kamino kon araba. Si no asperash muncho tiempo en la duana. El primer diya ke arivatesh a Salonika, despues ke deshatesh las validjas al otel, puedesh irvos a la kaza ande nasyo Ataturk. La kaye ande esta se yama Agiou Dimitriou. Mos vino muy enteresante esta kaza. En la eskola kuando era chiko mos kontavan esta kaza ande nasyo Mustafa. Mos emosyonimos buen karar de kaminar i ver las kamaretas i la guerta ande djugava Mustafa. Kaji mas de una ora pasimos aya. De aki en kaminando puedesh irvos a Plaza Aristotelous. Aki ay kafes lado kon lado. Puedesh bever un Frape o un Fredo ke es un kafe yelado. Despues ke eskansatesh un poko, vos puedesh ir al bodre de la mar en kaminando ande se topa la Torre Blanka. Puedesh suvir ariva i ver la sivdad de la muraya. De aki en kaminando puedesh irvos a las kayes ke se yaman Egnatia i Tsimsiki. Ay botikas, restorantes i kafes en estas kayes. A la noche para komer vos puedesh ir a Ladadika. Aki se topa munchas tavernas para komer bever i baylar.
Sigundo diya vos puedesh ir a Yedikule. Aki se topa la prizyon ke aviya antes, agora esta komo uno muzeo. Despues ke kaminatesh aki, vos puedesh ir a Tsimsiki ande se topa la iglesia Agias Sofias. De aki kaminando se puede ir a Ermou ande se topa la Ayazma Agia Theodora, ke es un Monasterio chiko. De aki puedesh pasar a la kaye ke se yama El Venizelou ande ay un Bedesten. La noche puedesh pasar i komer en Agora ke se topa allado de las kayes ke se yaman Egnatia i Ermou.
A la demanyana puedesh irvos a Mudanya, el viejo i de aki a Halkidiki. El diya entero puedesh pasar aki en entrando a la mar i en komyendo en los restorantes de las playas.
Despues ke pasatesh 3 diyas en Salonika, antes de tornar, si keresh puedesh irvos a la sinagoga ke se topa en la kaye Vasileos Iraklios, 26. En este kaye se topa un Merkado de frutas i verduras, si vos enteresa es ermozo i grande.
En tornando en el kamino, puedesh pasar de Kavala, İskeche i Gumulcine. De aki para ir a Estanbol kale pasar de Alexandropolis. Si tenesh tiempo, vos puedesh kedar aki un diya; puedesh entrar a la mar ke de yama Agia Paraskievi Beach o si no keresh azer un tur kultural, puedesh irvos a la Alexandropolis Mosque, Ethnologia Museum of Thrace i tambien a Light house ke se topa en el bodre de la mar i ke es el sembol de Alexandropoli. En las kayes de aki se topa todo modo de restorantes i kafes i ornos de pastas. De aki puedesh tornar a kaza despues de pasar unos kuantos diyas muy ermozos en la Gresia.
Viyajar es una Pasion…
