En las olimpiadas de Paris, el sovrebiviente de Nova, Yarin Shriki ke gano la medalya de oro, se sintio orguyozo en el podium kuando el imno nasional de Israel estava sonando. Unos kuantos dias antes, al ekipo israeliano les avian dicho, ke guadren sus orijin. El shampion nasional israeliano Shriki, de 22 anyos, dediko su viktoria a su mijor amigo, Yohai Ben Zechariah, uno de sinko de sus amigos asasinados en el festival Nova el 7 de oktobre. Tomar esta medalya de oro fue un momento de viktoria en medio de los mezes de dolor. “Esta viktoria es para todos en Israel, por modo de todo lo ke afito”, disho Shriki. “Kije komemorar lo ke le afito a mi amigo, i tambien porke ay tanto antisemitizmo en el mundo, es muy emportante ke el mundo oyga la Hatikvah”.
Kompetiendo en la kategoria maskulina adulta de manko de 69 kg, vensio dos kompetidores de Fransia i uno de Ukrania para ganar el oro en un atmosfer de odio. “Tuvimos seguridad 24 oras del dia, los 7 dias de la semana kon mozotros, del momento ke arivimos a París”, disho Shriki. “Mos disheron ke no amostremos nuestras bandieras o kualker sinyo ke semos judios. Dingun paiz no tuvo menester de guadrar su lugar de orijin. Suvir al podium kon muestra bandiera i muestro imno sonando, me sinti muy emosyonante. “Kreygo ke todos estavamos sintiendo el odio en muestro alrededor; yo sinti este odio tambien de los rivales kon los ke kompeti. Munchos de eyos eran pro-Palestina i no kerian ke gane. Venser los rivales fue partikularmente sinyifikativo i les amostro ke semos israelienos, semos judios, i no mos vamos a eskondermos mas. “Este sintimiento de odio no es muevo: kada vez ke ay una koza en la rejion sintimos el antisemitizmo. Ma esta vez la enemistad estava muncha mas grande por esto dediki mi medalya de oro a Yochai. Mos engrandesimos endjuntos de ke eramos bebes i izimos todo endjuntos. Gani por el, para ke el mundo lo rekorde. Todo fue por el”.
Shriki estava kon Yochai, dos de sus ermanos i un grupo de amigos en el Festival Nova la demanyana del 7 de oktobre kuando empeso el atako de Hamas. “Mos separimos kuando estavamos korriendo. No lo vide mas a Yochai. Todo lo ke savemos es ke lo kemaron, lo kemaron bivo. Su padre mos disho ke estava kompletamente kemado”. Shriki i sus dos ermanos reusheron a suvirsen a un oto i reusheron a alesharsen una mila antes de salir del oto i se eskondieron. Kuando se izo de noche, se suvieron al oto i arivaron a Beer-Sheva i reusheron a salvarsen. Mas despues se ambezaron ke el lugar ande se aviyan eskondido fue un lugar de batalya.
“No tuve tiempo de yorar, i dainda no tengo”, disho Shriki. “Dos semanas despues de Nova, kaliya ke me apareje para las ligas de kampeonatos i siempre es ansina. Tengo de azer antremanes tres vezes al dia; ganar es mi objektivo”. Aparte de aparejarse para si, entrena la jenerasion de praktikantes.
Mi objetivo es ser shampion del mundo i amostrar mi bandiera al mundo entero i kero ke el mundo entero oyga la ‘Hatikvah’ kuando gano”.
