Kada persona en syertas periodas de la vida pasa difikultades komo hazinuras, peryer sus echos, los problemes ekonomikos, las relasyones entre marido i mujer, la peryita de las personas amadas en el entorno, i otras kozas…
Kada persona no puede luchar de la mizma manera kon estas difikultades. Unos dentre eyos pueden kontinuar sus vidas de ande kedaron, otros no pueden liberarsen de los efektos de sus eksperyensyas durante muncho tyempo.
Los ke no pueden luchar, se topan en una depresyon.
Faktores de enfluensya a la rezistensya psikolojika:
- La prezensya de un mekanizmo de apoyo en la persona ke la ama, i tyene konfiensya en eya.
- La persona deve de tener las abilidades komunikativas avansadas.
- La persona deve de pueder rezolvar los problemes, i deve de tener la kapachidad de dirijir las emosyones.
- Las personas deven de akseptar ke el trokamyento es una parte de la vida, i ke es posible ke la vida no syempre se va asigun los planos ke azemos.
Para pueder azer pujar muestra rezistensya psikolojika kale:
- Tomar leson de muestros errores, mirar de avansar en todo modo de punto de vista.
- Tener personas en muestra vida ke mos dan apoyo i azer muevos amigos.
- En lugar de “Porke”, demandaremos “Komo?"
- Mos ambezaremos a kontrolar muestras emosyones.
Las difikultades son las realidades indispansavles de la vida. Los problemes chikos u grandes mos disiplinan sin darmos kuento. Las difikultades mos developan.
La pasensya es el mas grande poder, es la kapachidad la mas grande de suportar los problemes sin kesharmos. Es mas fasil de trokarmos mozotros ke trokar la sosyedad.
Konoserse i Evolusyonar
El konsepto de konoserse, es un fenomeno de tendensya en la psikolojiya. Se puede deskrivir komo, konoser los aspektos pozitivos i negativos de una persona, i evolusyonar.
La kapachidad para afrontar las difikuldades, pueden konvertir las krizas en oportunidades, azer pujar la kapachidad de transformar la dolor ke eksperimentamos en ganansya.
- La grandor de la viktorya se mezura kon la difikulta de la lucha.
- Las difikuldades las mas grandes de muestra vida, kitan afuera lo mas fuerte de muestro interyor.
- Kada difikulta kontyene una oportunidad. Lo emportante es ver esta oportunidad.
- Para obtener las mas grandes reushidades se deve de pasar por los kaminos los mas difisiles.
- Afrontar las difikultades tyene menester de la perseverensya. Esta karakteristika te enaltese. Konfrontar las difikuldades enfortese las personas.
- Las difikuldades son el egzamen de la vida. Kada egzamen ke pasamos, aze apareser el eroe ke tenemos aryento.
- Kada kayida, anonsa una mueva alevantadura.
- La soledad es una partida de la vida, ser en la vida sinyifika estar solo.
- Lo ke se mas mijor es ke, la vida syempre me ensenya las kozas ke no se.
