En el Medyo Oryento estos tyempos dalkavo kreo ke no es muy fasil de topar una peryoda kuando la djente estan en repozo. Kada diya un muevo evenimyento mos esta dando otras difikultades. Es la semana pasada ke dospues ke el muevo prezidente Persiano, Mesud Pezeshkiyan djuro por su mision, uno de los mas emportantes lideres del Hamas, İsmail Haniye fue matado a 150 metros en una kaza ande se kedavan los musafires los mas emportantes del estado Iraniano en Teheran. Ekzaktamente no se save komo fue matado, porke syertas vandas no keren achetar lo ke dizen los otros. No savemos si es por dizir la verdad o para no ser kupavles. Reelmente kon las teknolojias de oy en diya a lo ke esto entendyendo, no es muy difisil de matar a una persona de una distensya de unos kuantos miles de kilometros. Estos diyas dalkavo vemos ke munchos lideres del Hamas i del Hizbullah fueron matados en el Liban en Gaza i en Iran. Malorozamente Iran kreo ke es un grande payiz i para su puevlo deve de dar una repuesta. I esto es el empesijo del problem. En primero la media elektronika dyo randevu para el diya de shabat ma sin ke shabat empese esta vez se estava dizyendo ke esta data es el 9 del mez de Av. Esto kere dizir ke es noche de martes (lunes a la tadre) i diya de martes, Diya de Teisha beav. Oy diya de alhad kuando estava eskrivyendo este artikolo empesaron a anunsiar ke van atakar esta noche. El artikolo ke esto eskrivyendo no se si se va publikar . Si todo troka va ser ovligado de eskrivir un otro artikolo. Toda la prensa se esta demandando deke mataron Haniye en Teheran. Su buto era de tomar aryentro el estado Persyano. Reelmente una desizion muy emportante. Ya savemos ke los Iranianos no tyenen la mizma fuersa ke tenian anyos antes. La mas grande partida de sus aviones no lavoran mas porke estan bastante vyejos. I savemos de muestro payiz; la Turkiya estan tratando kon los Estados Unidos para renovelar sus aviones. Kon estas relasiones los Iranianos no tyenen esta posibilidad. I vamos a ver lo ke va afitar en el Medio Oriente. Kontra Israel; kon Israel!!! Komo kada semana, kero ogurar la pas en muestro payiz i la Pas en el Medio Oriente.
