En lo ke biviyamos en Galata, teniyamos un balukchi. Eran dos ermanos, Avram Monguldar i el ermano. Eran muy onestos. Kuando merkavamos el pishkado, ya saviyamos ke este pishkado era fresko. Estos balukchis, en sus primeros anyos de komersio, eran los balukchis de mis abuelos, la famiya Boton. Despues ke se engrandesyo mi mama i se kazo kon mi papa Eskenazi, estos ermanos ampesaron a yamarlo a mi papa, Mösyö Boton. Mi papa se inyervava.
Despues ke todos se movieron de Galata, eyos kedaron aya i mi papa se iva a merkar pishkado los Alhades. Aziya i un poko de nostaljiya de ver los lugares ande se engrandesyo.
En enverano teniyan una botika en el charshi de Büyükada. Kada empesijo de enverano era “topadura de Kosuegros”. En la kaza de mis paryentes kaje kada diya aviya pishkado. I no solo komida de pishkado, likorinos o lakerda o gupas, frisa, vahtes, chiroz, koyadura por empesijo. Los enveranos viniya mi mama a morar kon mozotros, de sorte ke komiyamos muncho pishkado i sovre todo gaya, ke se topava solo en enverano.
Un diya mi mama estava kansada, me fui yo a empleyar pishkado. Le demandi si tiene palamida o no me akodro kualo, me disho ke tiene una gaya muy freska. Le dishe: No mersi, no kero gaya. Deke? Me demando… Tu mama kada viernes ya merka. Le respondi: No kero esta semana, porke van a vinir los ijos i a mi yerno no le plaze gaya. Monguldar kedo kon la boka i los ojos avyertos. Ma demando: Atyo, no le plaze a tu yerno gaya? Tu yerno no es judyo parese? Le dishe si, si ya es judyo ma no le plaze gaya. Asta akel diya no teniya oyido ke a un judyo no le plazga gaya. En la plasa lo yaman a este pishkado “Yahudi balığı” ke kere dizir pishkado de los judios.
Esto, mos kedo komo un rekuerdo agreavle.
