Tenemos un grupo ke se yama BTS (Bir Tutkudur Seyahat) “Viajar es una Pasion”. Estavamos azyendo program de Crucero. Todos kijyeron ir a los Fiordos de Norvech. El Crucero para ir a los Fiordos partyiya de diferentes Puertos, komo Warnemünde, Kopenhag, Hamburg. Kijimoz partir de Warnemünde porke era serka de Berlin de este puerto. Ansina ivamos kaminar i ver una mueva sivdad, Berlin. Antes 6 mezes empesimos azer la rezervasyon de los oteles, del giya i de los restorantes. I empesi azer el program: 3 noches i 4 diyas en Berlin antes ke ivamos a salir a los Fiordos. Diya de Djueves, el grupo BTS kon 36 personas arivimos al Aero Puerto de Berlin Tegel. El giya mos tomo del aeropuerto en dizyendomos Bienvenidos. Empesimos al tur komo mos desidimoz. En primero mos fuimos a la Galeriya East Side i Check Point Charlie. Despues ke travimos unas kuantas fotos aki mos fuimos al Muzeo de los Djudyos. (Jewish Museum) En los anyos 1939 ke empeso la gerra mondial i el Holokosto en este sivdad, estava muy triste de ver este muzeo. A midi teniyamos ambre, komimos aryento del Muzeo ande aviya Kafe Kosher. De aki vinimos al otel ande ivamos a kedar 3 noches, Titanic Confort Hotel ke era muy serka a la istasyon del metro Alexander Platz. Despues ke deshimos las validjas a la kamareta, salimos a las kayes para kaminar i konoser la sivdad de Berlin. El grupo BTS kada mez un diya de Djueves mos topamos en Chichek Pasaji i bevemos unas kuantas biras i avlamos sovre destinasyones muevas ke keremos azer. Kuando estavamos en Berlin, era el diya de Djueves. Para azer el ritual de Djueves, diya de bever bira, mos fuimos a Prate Garten. Es un restorante aryento de una guerta muy grande. Bevimos biras kon pizza. Pasimos muy ermoza una nochada. Despues de komer i bever, kaminando mos fuimos para bever kafe a Bebel Platz. De aki kon Metro vinimos al otel i suvimos a las kamaretas.
Al diya ke era Viernes, mos alevantimos deskansados. Despues ke izimos el dezayuno en el otel empesimos al tur ke izimos el program antes de vinir aki. Ivamos kaminar, el monumento del Holokosto, la Sinagoga ke se yama Neue Sinagog ke se topa en Orient Strasse, el Monumento Rosentstrasse, el simbolo de Berlin, la Puerta de Branderburg i al Parlamento ke tiene el tejado de vidro. De aki se puede ver la sivdad en Panoramiko. Diya entero kaminimos la sivdad kon el Giya; estava muy enteresante. Despues ke eskapimos el tur, vinimos al otel. En primero izimos el Arvit de Shabat todos endjuntos i mos asentimos en el restorante del otel ande izimos la rezervasyon i el menu antes de vinir a Berlin.
Diya de Shabat despues ke izimos el dezayuno en el otel, kaminando salimos a las kayes i empesimos de Alexander Platz para kaminar i azer el tur del diya. Teniyamos el program ansina. En primero La Torre de TV, La Katedral de Berlin, Topographie des Terrors (Sentro Nazi/Gestapo) i el Muzeo Pergamon. Despues de midi izimos el tur de Rio Spree kon vaporiko. A la noche komimos en el restorante 12 Apostel. Despues de komer, kaminimos en Unter den Linden i mos asentimos para bever unas kozas i tornimos al otel.
Finalmente pasimos antes del tur de los Fiordes muy ermozo unos kuantos diyas, en Berlin.
Viajar es una Pasion
