Henryk era muy chiko en el anyo 1945 kuando la gerra eskapo i los sovrebivientes empesaron a tornar. El padre de Henryk, Joseph Foxman, lo aviya konfiado su ijo a su miradera para ke lo mire, i la mujer lo aviya tomado kon muncha kerensya porke lo keriya muncho bien.
La miradera de Henryk no se aviya imajinado ke el padre de Henryk iva sovrebivir despues de la destruksion del ghetto de Vilna. Aviyan transferado Joseph Foxman a Auschwitz, i todos saviyan ke dingun judio no puediya salir bivo de aya.
La miradera, despues ke adopto la kreatura, lo baptizo en la Iglesia Katolika, i lo estuvo embiyando a la iglesia para ke se ambeze el kateshizmo.
Kuando Joseph Foxman torno de Aushwitz, era el dia de Simhat Tora. Joseph vino a tomar a su ijo. La desepsionada mujer empeso a meter las vistimyetas de Henrick en la validja. Entremientes le disho a Joseph Foxman ke aviyan konvertido la kreatura al kristianizmo i ke Henrick se aviya echo un buen katoliko. Por esta razon, metyo el livro de kateshizmo en la validja.
Joseph Foxman tomo la mano de su ijo, i empeso a yevarlo direktamente a la Grande Sinagoga de Vilna. En el kamino, le disho ke el era judio i ke su nombre era Avraham.
En indosen a la Sinagoga, pasaron delantre de la iglesia. La kreatura disho ke kere entrar aryento. Esto le izo grande pena al padre. En este momento, un papaz salyo a la puerta, i kuando Henryk le tomo la mano para bezarla, el papaz le disho ke no se olvide ke es katoliko.
Joseph keriya aleshar su ijo del papaz i de la iglesia. Ma, ya saviya ke no es djusto. Estas personas aviyan engrandesido a su ijo, i ansi le aviyan salvado la vida.
Kaliya ke amostre el judaizmo a su ijo, el judaizmo vivante, i de esta manera, su ijo se iva olvidar, i iva abandonar estas kreensias etranjeras.
Entraron en la Grande Sinagoga de Vilna. Aya, rankontraron algunos sovrebivientes judios de Auschwitz ke aviyan tornado a Vilna, i agora estavan rekonstruyendo sus vidas i sus espiritus judios. En medio de la kruda realidad de sus sufrimientos i de sus terivles perdidas, los sovrebiventes estavan kantando i baylando kon alegriya, i ansi selebrando la fiesta Simhat Tora.
Avraham miro kon los ojos avyertos a su entorno, i tomo un livro de orasiones. Estava kontente de estar aya kon su padre ke apenas lo aviya konosido. Sigiendo los movimientos de los ombres i imitandolos, la kreatura empeso a baylar.
Un soldado judio ke vistiya una uniforma sovyetika, no estava puediendo aleshar sus ojos de la kreatura. El soldado se aserko de Joseph, i le demando: “Este ijiko es judio? Esta es la primera biva kreatura judia ke rankontri en estos kuatro anyos”.
El padre le respondio ke la kreatura era judia, i lo prezento a su ijo. El soldado teniya lagrimas en los ojos. “Keres baylar kon mi? Te va tomar enriva de mis ombros?” le disho al chiko.
El padre meneyo la kavesa, i el soldado lo tomo al chiko enriva de sus ombros. Kon lagrimas en los ojos i el korason yeno de alegriya, el soldado empeso a baylar kon el chiko. “Este es mi rulo de la Tora” disho el soldado.
Abe Foxman (Abraham Foxman), el direktor nasyonal de la Liga Anti-Defamasion, se akodra de este dia kuando tuvo su primer sentimiento de ser judio.
