Oy vos va avlar de una vizina del apartamento de Galata, madam Sofi. Verdad avlando su nombre no era Sofi, es ke yo le troki el nombre.
Esta madam Sofi era una mujer aedada, i era amiga de la madre de mi mama. Komo la madre de mi mama se aviya murido muy manseva, esta madam Sofi era komo una erensya para mi mama.
Madam Sofi era un poko pezgadika. Kada diya le mankava una koza. Kuando la renkontravamos en las eskaleras, siempre teniya un findjan de kafe vaziyo en la mano. Ya entendiyamos ke se iva a demandar alguna koza de las vizinas. En el apartamento eramos 13 moradores donde los 12 eran judios i el uno era levanten. Kaje kada diya viniya a demandar alguna koza. Un findjaniko de kafe, un findjaniko de asukar, o de sal, o de azete, o de vinagre, un gueviziko, un limoniko… Kuando viniya a pagar, me akodro ke mi mama solo akseptava el guevo i la azete. El resto no tomava. Diziya ke azete i guevo no se empresta. Sera un simbolo de la vida, no me akodro.
Otra koza ke mi mama se inyervava…
Kada nada viniya kon un pedaso de ropa en la mano. Diziya:
Idika hanum, kortame esta robika, yo ya la va kuzir.
Mi mama ya entendiya el hal ke le iva vinir a la kavesa. Kortava la robika i se la dava. Despues de una ora ya viniya madam Sofi. Idika hanum esta yaka por aryento ke la kuzga o por afuera? Meteme dos alfinetikas a si biva la hanum. Le metiya mi mama las alfinetes i se iva a su kaza. Despues de dos oras ya espuntava de muevo. Idika hanum a si biva la hanum, meteme dos alfinetikas a estas mangas, no esto bedjereyando. Le metiya las alfinetes i se iva de muevo. Viniya para ke la mama le aga el boy de la roba, ke tome mezura de las aldikeras, ke meta sinyos para las botonyeras. I ansina, sozde ke iva kuzirla eya, kaje mi mama se la eskapava de kuzir.
Otra koza, kuando se iva meter a kuzir a la makina, me yamava a mi. Elizika hanum ven para enfilarme la alguja de la makina. Povereta teniya antojos muy muy godros ke no estava puedyendo atinar i pasar el ilo. Agora ya la esto entendiyendo muy bien, ma akel tiempo no la entendiya. Me diziya de mi para mi: “Kualo ay de no pueder enfilar el ilo a la alguja?” Ma paresiya ke estava azyendo hadras.
Komo era la kantika de Orson Wells, ke la kantava a su inyeto o ijo? Tu no saves lo ke es ser viyejo, ma yo ya se lo ke es ser mansevo. En la manseves dingunos no puedemos pensar lo ke mos va akonteser en la vejes.
