En 1933 algunos Djudyos Amerikanos izyeron planes para matar a Hitler. Las otoridades Amerikanas ke supyeron esto, tuvyeron sar pensando ke puedriya ser un eskandalo enternasyonal ke el lider Alman sea matado por unos Amerikanos.
El 23 de Marso 1933, un syerto Daniel Stern eskrive esta letra al ambasador de la Almanya en Washington DC, dizyendo:
“Kerido Sinyor,
Rogi al Prezidente Roosvelt de protestar vuestro govyerno por las endinyasyones ke esta azyendo a los Djudyos en Almanya i de eskapar immediyamente i kompletamente esta persekusyon. En kavzo ke el Prezidnte no va azer dinguna deklarasyon, voz informo ke me va ir a la Almanya para matar a Hitler.
Kordialmente,
Daniel Stern”.
El Ambasador yeva esta letra al Ministro del Eksteryor Amerikano Cordell Hull, i el Ministro transfera la letra al Prokurador Jeneral, Homer Cummings. Aunke el Ambasador Alman, Friedrich Wilhelm von Prittwitz demisyona de su posto en el mez de Avril 1933, protestando a lo ke Hitler se izo Shanselye, los diplomates Almanes, egzijen ke esta menasa sea tratada seryozamente.
De una parte, el Prezidente Roosvelt, rezin elijido al poder, i tenyendo en la kavesa el problem de la depresyon amerikana de estos anyos, no teniya dingun interes ni en las persekusyones kontra los Djudyos de Almanya, ni de lo ke Hitler se izo Shanselye. De otra parte los militantes de la komunita Djudiya izyeron miting delantre los Konsulados Almanes de Nueva York, de Chicago, de Cleveland, de Detroit i mas. En esta atmosfera el Governo Amerikano la tomo en seryo la menasa. Por esto el prokurador jeneral Cummings se adreso a J. Edgar Hoover ke entonses era el direktor jeneral de las envestigasyones i ke despues se izo el fondador de le la F.B.I. el Büro Federal de Investigasyon. Para topar Daniel Stern ke era un gangster deskonosido, kontaktaron los famozos gangsteres Djudyos komo Meyer Lansky, Bugsy Siegel, Dutch Shultz, Lepke Buchalter ma dinguno de eyos no mansino a Daniel Stern i al reves estavan byen guluzunados a tomar parte en este komplo ama se ezvachearon porke un komplo asemejante puediya danyar las aktividades klandestinas ke teniyan.
En los archivos de la F.B.I. el dosye no 65-53615 eksplika muy byen i kon munchos detayes este komplo ke fue amatado por el ministeryo de la djustisya Amerikano i de esta manera salvaron la vida de Hitler asta la fin de la sigunda gerra mondiyal.
Fuente: Robert Rockaway, Claire Levenson
