La avyertura de los djugos olimpikos ke se realizo en Paris la kapitala de Fransya, se selebro en el Rio Seine. Es por la primera vez, ke se realizo afuera del stadium, en el sentro de la sivdad.
Aviya una luvya muy fuerte, ma los atletes de 206 paizes, durante la seremoniya debasho de la luvya, pasaron kon las barkas en el rio. La bandyera turka fue transportada por los championes viejos.
En esta seremoniya el direktor i aktor fransez Thomas Jolly fue el direktor artistiko de mas de 3.000 bayladores ke izyeron manyifikos espektakulos.
En el senaryo ke se preparo, la antorcha (meşale) olimpika fue yevada a la plasa de Trokadero. La antorcha fue yevada al Museo Louvre, a la Katedral de Notre Dame i a la Torre Eiffel. Se dyo grande emportansa a la Liberta, Egalita i Fraternita, ke son los tres simbolos emportantes de la egzistensya de la Fransya.
En esta fyesta Celine Dion kanto kon su boz de seda.
Aviya una segurita muy grande. Miles de polisiyas, soldados, segurita privada… Munchos puntos emportantes de la sivdad estavan serrados al trafiko i a los pasos de pietones, solo los veikulos otorizados puediyan sirkular en estos kaminos. Se bivyo munchos momentos difisiles a kavza de la luvya fuerte.
El grupo de Algeriya, no se olvido del anyo 1961. Eyos echaron rozas al rio Seine i mensyonaron, a los syentos de eyos ke fueron matados por la polisiya franseza, i kommemoraron los muertos ke fueron arrondjados al rio Seine. Algunos paizes ke kompetiran en estos djugos olimpikos, atiraron la atansyon kon sus kostumes multikolores. Estos paizes preferaron vistidos spesifikos de sus kulturas. Espesyalmente Mongolia, la Republika de Irlanda, Haiti, Korea del Sud, Kenya i Taiwan kon sus vistidos atiraron la atansyon de todos.
El djugador ke es la estreya de basketbol, Lebron James transporto la bandyera de los Estados Unidos.
Teddy Riner i Marie-Jose Perec asyenderon la flama olimpika.
Las branshes de las kompetisyones son:
Atletizmo, badminton, basketbol, boks, kano, bisiklet, ekitasyon, eskrim, futbol, jimnastik, halter, hentbol, hockey, judo, branshes akuatikas, tekvando, tenis, ping pong, tiro al arko, triatlon, navigar i voleybol.
En este program ay 300 kompetisyones. 10.500 atletes de 206 paizes differentes van a azer kompetisyones en 32 branches i en todo van a ganar 329 medalyas de oro.
A kavza de la gerra entre la Rusia i Ukranya, los atletes rusos no van a pueder partisipar kon sus propyos simbolos nasyonales a estas kompetisyones.
Las bandyeras de estos dos paizes, i sus imnos nasyonal no van a tener lugar.
Kale ver los djugos olimpikos komo un evenemento sportivo global, ke kere tomar todo el mundo debasho sus alas en pas i amor.
