Kada vez ke ago el program de viyaje, miro en el internet en Youtube, les demando a los amigos konosidos ke se fueron mas antes, tomo enformasyones i aparejo el program de kaminar. Kada Youtube ke vide i kada amigo ke demandi todos me disheron en Las Vegas vas a kaminar los Oteles. Komo? Mas no ay koza de ver? Si puedes irte a los Kanyones ke se topan aya es emportante para ver. No me kuadro muncho antes de irme, dishe veremos kualo vamos a topar. Kuando abashimos del avion, mos tomo el giya para yevarmos al otel. En el kamino mos konto un poko sovre Las Vegas. Aki vienen los turistos mas muncho por djugar en los Casinos i deshan munchas paras. Del aeropuerto fina el otel kaji vinimos en medya ora. El otel era Golden Nugget i la kaye se yama Freemont Street. Kuando entrimos al otel, mos enkantimos de ver la entradura, en el lobi en kada paso aviya makinas de djugar. No vos vash a kreyer fin aryento del banyo aviya makinas de djugar. Muy enteresante un otel. En mi vida no vide dos resepsiones en un otel. Aki aviya. En el lobi aviya botikas, kafes, restoranes i un Casino muy grande. Dike estava komo una kaye de afuera. Arivimos de noche i teniyamos ambre; moz asentimos en el restoran del otel i komimos por la noche.
Al diya salimos para kaminar. Unos kuantos amigos se fueron al Grand Canyon. Yo i unos kuantos amigos mos fuimos a la kaye ande se topan los oteles Strip. Aki se topa mas de 30 oteles. Mozotros aryento de estos oteles mos fuimos para kaminar el Luxor, Paris, Treasure Island, Caesar Palace, Aladdin, Bellagio, Exalibur, MGM, Mandalay Bay, Venetian, New York i el Stratosphere Otel. Kada otel era dekorada kon el nombre ke se yama. Por egzempyo Paris teniya el Eifel, Venetian teniya aryento la Plaza San Marco kon las Gondolas, en Luxor aviya Piramides. Kada otel kaji tiene 4.000 o 5.000 kamaretas; son komo sivdades chikas. Komo dizen estos oteles no se puede kontar, kale ver i bivir.
El diya, tambiyen kada noche en kada otel ay diferentes Showes i aktividades. En los Casinos puedesh djugar todo modo de djugos. BlackJack, Poker, Rulet ets. En Freemont Street ande estava el otel muestro, Golden Nugget kada noche aviya el Show de las luzes. En el techo de esta kaye aviya ampules 2.100.000 deyos (no meldatesh yerrado dos milyones i siyen mil) i estavan azyendo un Show maraviyozo de luzez. Ya vos dishe no se puede kontar, kale ver.
Mas de esto, aki se topa un Mall grande, unas kuantas Sinagogas Ortodoks, Konservatif i Reformist. Ay una lokanta Kasher ke se yama Shalom Hunan en Flamingo Street.
Viajar es una Pasion…
