Dostoyevski era muy amator de djugar kumar. Por esta razon se endevdo miles de rubles, no estava puedyendo pagar su devda. En este momento, un editor nombrado Stellovski savyendo su fama de djugador, le dize a Dostoyevski:
--- Yo te va pagar todas las devdas i te va dar un montante de paras ke te va sirvir kaji 2 anyos ma kale ke sinyas un kontrato.
--- Kontrato? Ke me demandas?
--- Yo kero ke me eskrivas un kurto romanso. Este romanso lo kero en 24 mezes. Si lo eskapas i me lo entregas en entervalo de 24 mezes, no va aver dingun problem. Si no me lo entregas en 24 mezes, mezmo un diya si tadras, los derechos de todas las ovras ke emprimates fin agora i las ke vas a emprimar mezmo, seran miyas.
Dostoyevski tanta devda teniya i ke no era posivle de pueder pagar, ovligado sinyo el kontrato.
Ya paso 23 mezes, Dostoyevski no eskrivyo ni una fraza. El eskritor Stendhal ke ya estava al koryente de todo, le konsejo de eskrivir en diktando (en avlando). No tenyendo otro remedyo Dostoyevski aksepto esta idea.
Akel tyempo en Rusia, aviya una eskola de sekretaria. Una buena eleva de esta eskola, nombrada Grigoryevna Snitkin, le disho a Dostoyevski ke seria muy oroza de lavorar kon un eskritor komo el i aksepto.
El ultimo diya, Dostoyevski se lo yeva imediatamente al buro de Stellovski. Ma topa el buro serrado. El buen del eskritor, para tomar todos sus derechos akel diya serro el buro para ke Dostoyevski no pueda entregar su romanso.
De vista se fue a la polisiya, peno i lazdro, tomo avokatos, kurto parvino a ganar el proseso i organiza una fyesta kon vodka para selebrar la viktorya.
Por siguro tanbyen envita a Grigorievna Snitkin.
Dospues de komer i bever, Dostoyevski toma la palavra i le demanda a la ermoza Grıgorievna:
--- Kero eskrivir un romanso, ma kero saver tu opinyon
--- Me alegro muncho; ke sujeto es?
--- Ay un ombre, es una persona terible, sufre de atakes de epilepsi, es un mal djugador i piedre muncha moneda. Este ombre esta ennamorado de una muchacha muncho mas manseva de el, komo le puede propozar de kazarse kon el?
La ermoza muchacha le responde:
--- Esto akseptando su propozisyon, si, me kero kazar kon el sinyor Mikhailovich.
El romanso ke eskrivyeron endjuntos es “EL DJUGADOR”, en turko “KUMARBAZ.
En ora de murir le disho a su ermoza mujer:
--- Anna, nunka te enganyi, mezmo en mis esfuenyos, nunka.
