Kuando va vinir, ke venga, ke se eskape, este invyerno en dizyendo, estamos aryento de puro enverano. No kedo nada, i ansi se va eskapar ya vinimos a la fin del enverano, para mi kuando empesan las eskolas es eskapado. La kalor de este anyo no se vido, kada anyo dizimos este anyo ay muncha kalor, ma lo de este anyo no se vido. Komo dishimos, komo agua, si esto modo esta pasando la vida, de este enverano no entendimos nada.
Tu diras deke, porke no estas puedyendo ir algun lugar, todo se izo muy muy karo,
antes asperavamos ke venga enverano para ir a los konseres, oy un konser se izo miles de liras, avre el youtube mira, es mas barato. Asperavamos la fin de la semana para ir a la plaj, en Estanbol los presyos de las plajes esta kemando la aldikera, por esto al banyo de kaza mete una foto de mar, i entra para tomar una dush es mas mijor. Asperavamos al enverano para azer una semana de vakansas, agora para azer una semana de vakansas kuanto kosta ya saves, para una semana lavora un anyo, el mas kilipur lugar bile se izo muy karo, el nombre se izo butik. A la fin de la semana ir a la ada es komo una gerra, kome haftona es mas bueno. Los ke van todo el enverano a la adas desde munchos anyos, la jenerasyon mueva no esta indo, porke las kazas estan muy karas.
Por esto este anyo kon klima ayreziko fresko esta pasando el enverano en kaza.
Komo agua estan pasando los diyas, los anyos, fin ke aboltimos la kara ya va vinir
ROSH ASHANA, es ke se eskapo el anyo. Ma es una esperansa el muevo anyo, rogamos ke venga kon su ermozura, kon su parnasa, kon su sanedad, i kon pas.
Ni un dondurma komi este enverano, un topiziko se izo kuantos liras; el melon, el
karpuz esto travando las fotos, no entendimos nada de este enverano. Parese vamos a asperar al otro anyo puedeser se aze todo barato. I pasamos un enveranooooo muuyyy ermozo, muncho asperas.
De vez en kuando kale azer shakas, si no, no pasa la vida. Keridos, dias buenos i alegres ke tengash, kon sanedad, i ke kada diya vos pase en riyendo!
