Estamos en el mez de Agosto i el personaje relatado a este mez es Sir Moses Montefiore. Sir Moses Montefiore (1784-1885) tuvo un impakto ekstraordinaryo en el mundo. Empesando una karyera en los negosyos en jeneral, Montefiore en poko tyempo obtuvo una de las 12 lisensias de korredor rezervadas para los Djudios en la Borsa de Londra. Kuando Montefiore se retiro del negosyo, kuando teniya un poko mas de 40 anyos, ya era un ombre archi-riko.
Los esforsos filantropikos de Moses Montefiore i su voluntad de dar un paso adelantre para defender a sus ermanos Djudios le valyeron una grande admirasyon i fama. Entre sus munchos reushitas filantropikas verso los Djudios se topan sus esforsos por bushkar remedyos para la libertad de los Djudios de Siriya arestados i emprizonados en Damasko achakes de un libelo de sangre i su viaje a la Rusia para suplikar al Tzar por tolerensya verso los Djudios. Los Djudios del mundo entero lo konsideravan komo sus protektor i uno de sus lideres.
Montefiore i su mujer, Judith, apoyaron institusyones Djudias i no-Djudías en Inglaterra. En Ramsgate, ande biviyan, fraguaron una Sinagoga i una Yeshiva Sefaradi.
Montefiore es mas venerado por su lavoro filantropiko en la tyerra de Israel, ke vijito personalmente syete vezes. Apoyo la industria i la edukasyon, ma tambyen bushko remedyos para ke los Dudios de Israel fueran mas oto-sufizyentes. Entre los famozos proyektos de Montefiore en la tyerra de Israel ay el molino de ayre en Yemin Moshe i la konstruksyon de la maalle de Mishkenot Sha’ananim, un evento uniko por akel tyempo por estar afuera de las paredes de la Sivdad Vyeja.
Komo Djudio sefaradi, la observansiya de las leyes Djudias de la parte de Montefiore se enforso por su amor por la tyerra de Israel. Era famozo por viajar en su karosa tirado por kavayos, kon su propya Tora i shohet i por yevar sus propyos platos i komidas a los banketos. (Para observar el Kasherut).
Montefiore, fue nomado “Chevalier” por la reyna Victoria, sirvyo komo sherif de Londra i fue prezidente de la Komite de Deputados de los Djudios Britanikos (1835-74). En 1846 resivyo el titulo de baron.
Sir Moses Montefiore muryo pokos mezes antes de kumplir 101 anyos, el 13 de Av de 1885. (27 Julio 1885) ke era Shabat pasado.
