En el rezumen de la perasha de la semana pasada, aviya el artikolo realisto i sorprendente de “Leyla Navaro” ke eskrivyo en el Şalom. Me plazyo tanto ke lo kije partajarlo kon vozotros keridos lektores.
En sus palavras estamos vyendo la verdad amarga ke esta klaramente ekspresada: “Hola Amigos! Ke es este Maraton? Ande estamos koryendo? Para ke tipo de mundo estamos preparando a muestros mansevos i a sus ijos?
La kondisyon de empesar a la vida, es una vida determinada en bivyendo en los distriktos luksuozos, pasar las fines de semanas en los sentros komersyales, embiyar a los ijos a las eskolas famozos i muy karas, ir en vakansas, komer en los restoranes famozos. Esto todo esta un simbolo absoluto de ser akseptado i egzistir en la sosyeta? Esto es lo ke asperamos de la vida? Estos son los unikos valores ke keremos deshar a muestros ijos? Los mansevos de agora keren alkansar imediatemente el standart de los paryentes ke alkansaron este standart en sus anyos 50-60.
Para esto estan lavorando komo esklavos en las plazas, de la madrugada fina medya noche, sin ver el sol, sin ver la luz de personas, sin saver kuando es demanyana, kuando vino la noche.
A mi avizo esto no es la vida. Esta vida ke se esta konsumyendo muncho, es el model de vida dezeada ke prezentamos a muestros mansevos? Sakrifikar su vida por esta razon i pedrer sus mijores i mas produktivos anyos en esta karyera?
Despues de largas oras del lavoro, el trafiko ke no se esta puedyendo suportar, las personas ke estan vinyendo a kaza muy kansados son los konfliktos familyares inevitables, esto es la vida respektable ke estamos ofresiendo a los mansevos, la piedrita de todos… Estamos konsyentes de lo ke estamos azyendo?
Delantre de eyos ay el espanto de no pueder reushir, la fatiga fizika i mental i munchas otras kozas.
La patolojiya de muestra komunita ke las valores estan indeksadas unikamente a la rikeza, no egzistir por el simple echo de ser riko.
Ya basta!...
Egziste una kura para esta hazinura i enfermedad?
Si ay una kura ke es? Ay muncho ke dizir i diskutir sovre este sujeto, si keremos eskrivir esto todo, ni las ojas, ni la pasensya para meldar seran sufizientes.
Kuando keremos adaptarmos a este sistem, mos estamos aleshando de muestra propya kultura i valores. Esta kultura i valores son muestro protektor el mas fuerte.
La kura para muestra enfermedad es siguramente,
TESHUVA, TEFİLA, TSEDAKA.
Teshuva: Es un arrepintimyento total. Muestra unika salvasyon de esta vida, ke se baza en valores materyales i aleshada del Dyo, es ver muestros errores, arrepintirmos de eyos, i dirijarmos por el kamino korekto ke es el kamino de la Torah.
Tefila: Orasyon… Kuando mos sintimos aleshados del Dyo, muestras orasyones i la propya tefila mos kayentan i mos dan pas. Te aserka muevamente a las valores spirituales.
Tsedaka: Kuando mos durmimos, kuando no vemos al Dyo, en estos momentos, mos olvidamos muestra responsabilita entre las personas. Estos son los momentos en los ke somos kompletamente egoistos i pensamos a mozotros mizmos.
Ayudar a los ke tyenen menester mos da una satisfaksyon i mos espertamos kon estos sintimyentos. Mos sintimos serka del Dio.
Teshuva: Es el kamino de arrepintimyento i endjuntos mos vamos al kamino de la Torah.
Tefila, es la entegrasyon kon orasyones i,
Tsedaka: la utilidad.
Ke el kamino de todos mozotros seyga klaro i briyante”.
