Dos semanas antes eskrivyendo mi artikolo no estava siguro si va topar lugar en el semanaryo o no. Malorozamente fue publikado i nada troko en el Medio Oriente. Agora dainda se esta avlando ma no estamos vyendo pasos para la PAS en el Medio Oriente entre Israel i los Palestinianos. Los Israelyanos no estan muy repozados porke los Iranianos keren atakar kontra la muerte de Haniye en Teheran. Ma komo no estan bastante fuertes, no estan atakando imediatamente. Vamos a ver lo ke va afitar…
Ya meldatesh ke publikimos un muevo livro “El Mupak de Berta la Çanakkaleliya” Ma, no fue publikado en Judeo-Espanyol; fue publikado en turko i en inglez. Malorozamente el koste para embiyar esta muy alto. Ma estamos tratando kon una mueva kompanyia para tener presyos mas baratos. Estamos vendyendo el livro en el Muzeo Djudio, el el Sit internet del Sentro Sefardi. Para la Turkiya vash a pagar solo el presyo de la firma de kargo ke no es karo. Ya lo puedesh merkar del Şalom, mizmo en la plaj del mas emportante Klub de la Büyükada. Gila kere organizar un diya en Burgaz para ke Berta sinye su livro. Vemos ke la djente reelmente se esta enteresando kon un livro asemejante.
Diya de Alhad en el Muzeo de la Ada tenemos tres diferentes aktividades. A las dos dospues de midi vamos a vijitar la ekspozisyon de muestro amigo Rubi Asa, ke es kompozada de fotografias asemejantes a las kartpostales de 100 o de 125 anyos. Fotografias realizadas del mizmo punto de vista. Reelmente una ekspozisyon muy enteresante. El mizmo diya, muestro amigo Alberto Modiano va avlar a las18.00 sovre la Eskola de los papazes de Heybeli i va mostrar el filmo ke realizo sovre el mizmo sujeto. Un livro sovre este sujeto fue publikado por el Muzeo de las Izlas. I Alberto es el otor de este livro.
Este diya va topar fin kon un parti ande vamos a topar la posibilidad de baylar kon las kantikas de los anyos 80 i 90. I devemos de vistirmos. Puedesh vistir las vistimyentas de los anyos 80 i 90!!! No se komo ma vos va dizir. El nombre del parti es “Adio al Enverano”. Todo esto se va realizar en el Muzeo de la Ada serka de Aya Nikola.
