Las kazas antiguas de tavla, son echas en el tiempo de los Otomanos i tienen una muy ermoza arkitektura. En estas kazas ke eran komo palasyos, moravan lo mas famiyas rikas i aristokratas. El material de tavla dava a estas kazas una estetika. La mano de ovra elegante dava a kada kaza una espesiyalidad diferente.
A estas kazas las yamavan “konak” al tiempo.
Estos konakes eran de dos o tres etajes. Teniyan entradas anchas, kon skulpturas finas de tavlas, tavanes altos i eskaleras estetikas. Afuera de la kaza se viya balkones serrados kon pandjures, ke lo yamavan “djumba”. Estos balkones eran serrados para ke no se veya de la kaye la persona ke esta asentada aryento.
En los etajes de ariva se topavan kamaretas anchas kon ventanas estrechas para ke no entre muncho sol en enverano i muncho friyo en invyerno.
Kon tiempo estas kazas o konakes si no estan miradas bueno, se estan eskayendo i los estan restorando de muevo. Unos kuantos los izieron muzeos porke los patrones no estan puedyendo abasteser a los presyos de restorasyones. Komo son kazas antiguas, la restorasyon deve de ser identikas. Sin permisyon no pueden enklavar ni un klavo. Konosko kazas de tavla ke son lado kon lado, la una se miro bueno i la otra se desho komo estava, a padaso a pedaso, se derroko.
Estos konakes tienen tanbien grandes guertas ande se topa arvoles de frutas, flores, statuas o shadirvanes. En la una punta de la guerta ay kameriyes ande los amantes pasan oras agradavles en lo ke ay lunar.
Los konakes tienen siguro munchos rekuerdos. En estas kazas nasen kriyaturas, se kazan las mansevikas, se van asker los mansevos i siguro ay ken mos desha la buena vida. Biven munchas jenerasyones endjuntos.
El atmosfer kayente de estas kazas de tavla se meskla kon el perfum de la tavla i mos yeva a los rekuerdos akumulados de los anyos, a una nostaljiya.
En estos lugares, las famiyas se arekojiyan al tiempo al doredor de las sobas, ande se aziya moabet kon rizas. Antes, la djente biviya una vida mas kalma, kon la natura, entre eyos, leshos de la vida moderna. La mas aedada era la shefe de la kaza. Dingunos no puediyan vinir kontra eya. Biviyan munchas personas todos endjuntos. 3-4 djenerasyones endjuntos.
El Dio ke mos guadre, kuando afitava un fuego, se kemava la kaza entera, del tavan asta el bodrum. Tanbien puediya saltar i a las kazas del entorno.
Komo el fuego ke pasimos anoche en Büyükada. Se kemo una kaza antigua ande mas no moravan kaje dingunos. Esta kaza estava djusto 5 metros leshos de la muestra. Dainda no se save komo se kemo. Ma grasias a los bomberos, en kurto tiempo amataron el fuego, ke las flamas estavan suviendo al sielo.
El Dio ke mos guadre de todo modo de katastrofes.
