En el tyempo de la pandemiya ya mos aviyamos olvidado de dar la mano para saludarmos. Al pareser ke esta kostumbre de dar la mano no es una moda de muestros diyas, ama es una tradisyon ke egzistiya desde munchos anyos.
Esto es un reliyeve del siglo 9 de A.E.K. (Antes de la Era Komun), ande el Rey Asiryo Salmanazar III esta dando la mano a un dinyitaryo de Babilonya, konfirmando el tratado de paz. La pandemiya mos aviya ambezado tanbyen ke munchas hazinuras puediyan pasar de una mano a una otra mano. De mizmo, abrasarmos, bezarmos, ke sembolizan komo dar la mano, la amistad, el kerer, la asiguransya; i estos aktos pueden azer pasar las hazinuras de una persona a una otra persona. La pandemiya mos izo ke mos tokemos kon los punyos o kon los kovdos.
En este relyeve de los Komagenes ke es en Arsemiya, serka de Adıyaman, estamos vyendo ke el rey Antiochos esta dando la mano al famozo Herakles. Asi dar la mano syempre fue un simbolo de kontratar una paz. Kuando dos manos se tokan, esto amostra ke las manos estan vaziyas, no tyenen dinguna arma para atakar. Meneyar el braso en tokando la mano de otra persona, amostra ke ni en el braso se topa alguna arma sekreta para atakar.
En este relyeve grego del treser siglo de A.E.K. (Antes de la Era Komun), vemos ke el ombre i su mujer se estan despartyendo, se estan saludando dandosen la mano. Kon el tyempo, saludarse dando la mano, se izo muncho mas demokratiko, al lugar de las reverensyas ke se aziyan abokandosen, koza ke egziste aun oy en las famiyas royales de syertos payizes. Porke dar la mano es dizir ke semos iguales, por lo menos en el momento. Una otra forma de dar la mano es meter la otra mano en el ombro del denfrente. No se save muy byen si esta forma de saludar es por senseridad o para manipular. De mizmo tener la mano del otro kon dos manos komo un sandvich puede tener la mizma sinyifikasyon. Si dando la mano, el denfrente te toma solo los dedos, esto amostra ke el denfrente no tyene muncha sempatiya para ti.
En India, al lugar de darse la mano se dizen “Namaste” ke kere dizir “Me aboko delantre de ti” tenyendo las dos manos endjuntos al nivel del korason komo si diriyas pardon. En China, la forma de saludarsen es abokar un poko la kavesa sin darsen la mano.
