Es diya de alhad ke en la Büyükada avia syertas aktividades kulturales. Empesando del diya de shabat, verso la tadre en el Muzeo de la izla avia una konferensia sovre los turistos. Mizmo en la Turkiya komo en Venezia i komo en siertas sivdades de la Espanya, no keren mas turistos. Es djusto ke no keren ver un djenero de turistos. Si no los turistos Evropeos son akseptables por los Adalis. Kuando entri al Muzeo, muestro eks-presidente Halim Bulutoğlu me disho ke ay una damma italiana ke kere estar en kontakto kon un Djudio de la Komunidad d’Estanbol. Eya era Kristiana ma tenia dos amigas en Milano, Djudias; i sus nombre de famiya era Kafka. Tuve la posibilidad de avlar kon eyas; i estavan bushkando syertos paryentes ke bivyeron en la Izla de Prinkipo i sus nombre de famiya era Modiano, de Salonika i kreo kazado kon un Pardo de Salonika. Le dishe ven amanyana tenemos la konferensia de Alberto Modiano; i el nombre del tiyo de su madre era Pardo. Ya konosimos al Sinyor Pardo ke tenia una botika en la Ada ande se vendiya ilos, algujas, lanas, todo modo de kalsas, kolonyas i un alay de kozas ke emplean las mujeres. Alberto mizmo lavoro en esta botika. Ma alhad esta mujer no vino al muzeo.
Alhad dospues de midi tuvimos la posibilidad de partisipar a la ekspozisyon del artisto de fotografias Rubi Asa. El aparejo mas de 100 fotografias inspirandose de kartpostales antiguas. Lo mas muncho de 100-120 anyos. I fotografio del mizmo punto de vista estas kartpostales oy en diya. Reelmente una maraviya i muy enteresantes. Si keresh mizmo tenesh la posibilidad de merkar una de estas kartas ke son buchukes kon una diferensya de 120 anyos.
Es dospues ke Alberto Modiano amostro su filmo sovre la Eskola de los Papazes de Heybeliada. Vos konti kreo unas kuantas vezes su filmo sovre la Eskola de Halki. El mizmo diya avia una konferensia en otro lugar sovre Trochki. Mizmo kon esta konferensia, munchas personas asistyeron a este filmo. No se si savesh ma Trochki dospues ke se fuyo de la Rusia unos kuantos anyos antes de irse a Meksiko bivyo en tres diferentes kazas en la Büyükada. Ma komo teniya un espanto ke lo van a matar, a la fin se fue de la Büyükada. Los Meksikanos mas entelijentes formaron el Muzeo Trochki en Meksiko. I munchos turistos vijitan este Muzeo.
Kon la fiesta nasyonal del 30 Agosto, puedemos dizir ke la fin esta serka para las izlas (este anyo). El anyo ke viene esperamos de toparmos en salud.
Dos haberes ke no tyenen dar i aver kon el enverano; estamos vendyendo el livro de Berta Penso sovre las Komidas Djudias de Çanakkale. Oy diya de lunes el kuatren livro de Matilda Koen-Sarano, ke su alma repoze en Ganeden, fue publikado por el Sentro Sefaradi de Estanbol. En unos kuantos diyas vash a pueder merkarlo en el Sitio Internet: istanbulsephardiccenter.com
