Apartener a la izla BURGAZ, es un privilejyo.
Memorias de Burgaz desde los anyos 1940 asta la aktualidad.
Keridos Lektores,
Este livro eskrito por el Dr. Robert SCHILD, tyene la misyon de azer konoser a todos, los ke apartyenen a esta izla i es una ovra invaluable para pueder yevar sus bozes a las jenerasyones futuras.
Dr. Robert Schild izo konversasyones kon 63 personas, el mas mansevo de 31 anyos, el mas vyejo de 89 anyos. Munchos de eyos disheron: La izla ande aviyamos bivido, era en un tyempo pasado, era totalamente otra en todos los puntos de vista.
Ser de Burgaz es una forma de vida. Veygo mi manseves en kada vez ke nado en la mar. Burgaz se sela kuando te vas a otro lado.
Estas ekspresyones son muy valutozas para mi.
Los ke me esto akodrando kon gratitud:
Mi amigo, Erwin Köhle se konta komo un duayen de Burgaz. Kuando eskrivi estas linyas, mi aliado, Erwin Köhle teniya 88 anyos; en enverano kaminava kon su barka todas las izlas i entrava a la mar. El padre del granpapa aviya vinido en el anyo 1846 de la Alemanya a Estambol para lavorar.
Su famiya estava en Alemanya. 10-15 famiyas nomadas los
Alemanes del Bosfor pasavan sus enveranos en Burgaz.
Dr. Robert Schild en eskrivyendo este livro, se rankontro en Viyana en un kafe kon un djudyo ke tyene 89 anyos, kon otro aleman de 87 anyos, ke desho la Turkiya antes 54 anyos.
Kuando estamos meldando este livro, mos estamos topando en una mar de rekuerdos. Los ke bivyeron mizmo en el empesijo del siglo ke paso, estan salyendo a luz.
Estamos remarkando komo trenta relijyones i etnisidades diferentes, i Schild esta remersyando a todos los ke embiyaron sus rekuerdos, sus fotos de famiyas i todos los aliados de Burgaz kon agradesimyento.
El kontenido de este livro se diviso en kategorias diferentes.
Los Duayenes, los ke estan en Atina en la Gresya, los ke nasyeron i kresyeron en Burgaz, kaminando en el charshi, muestros Atletes, los Eskritores i los Artistos, los ke miran de en frente, los ke se akodran de Burgaz i los ke mantyenen biva la izla de Burgaz.
Dr. Robert Schild eskrivyo en munchas revistas, jurnales, tyene livros, i es un maestro ke eskrive istoryas meskladas kon imajinasyon i realidad.
Apartener a esta izla era una sivilizasyon diferente.
Burgaz en el empisijo de los anyos 1970, teniya una manyifika varyeta de kulturas i puevlos kon sus gregos, armenios, djudyos, kurdos i otros… En las fines de la semana, los shabates i alhades, Paradiso aziya muzika grega, se rompiya platos, se djugava sirtaki, i todo durava asta la demanyana.
Esta multitud kosmopolita biviya kon grande kompreansyon entre eyos, amista, tolerensya i armoniya.
