El mez de Av sigun el tyempo de la Tora es el sinken mez de muestro kalendaryo, siendo ke el anyo empesa en Nisan. Este mez es atado al trivyo de Shimeon i su sensya spiritual es oyer… oyer, entender, sintir. Shimeon es el ijo grande de Lea i Yaakov. A su nasimyento Lea disho ansi, “Si Dyo oyo mi dolor (Shemi Oni) i me dyo un segundo ijo "Siendo ke Lea era manka amorada de amor, a ken se la aviya dado kon falsiya. El karakter de Shimeon se puede entender de los byervos de la bendision de Yaakov a sus ijos “Simeon i Levi son ermanos; no saven detener sus ravyas i azen munchos danyos". Estas palavras mos akodra el evenimyento de Dina i Yaakov i ermana de Simeon i Levi… Visto ke Dina fue fuyida por el Prens de Shishem, eyos tomaron una vengansa muy grande del puevlo entero de Shishem. Estos dos Trivyos no tuvyeron un tereno a eyos i se dispersaron en los otros Trivyos de Israel. Shimon i Levi ovligaron a los ombres de Shishem a azersen Berit i el diya ke estavan muy desfuersados los pasaron a todos por la espada, mizmo la ijika ke paryo Dina la kijeron matar si Yaakov no la salvava.
La Tora amostra siempre la verdadera facha de kada umano ke es en mizmo tyempo andjelo i guerko. Yaakov era ajeno en Shishem i su pozisyon fue despues de este evenemyento muy pezgada, siempre iva kampar en el sud del Mishkan, su piedra es el Topaz i su bandyera es amariya kon un desen enriva. El Sefer Yetsira mos ambeza tambien ke el sensyo spirituel es oyer no de una manera fizika, entender lo ke el otro pensa en su alma, oyer en silensyo… “The sound of silence” es la mas djusta palavra. Por el entender en silensyo, lo ke la oreja no puede oyer, KOL DEMA-MA DAKA mos dize el livro de los Reyes en la Biblia… Oyer afuera de la oreja. Miri de dar a entender el mistisizmo de este penseryo…
1) Agora daremos las datas emportantes de este mez, donde la prensipala es Teshabeav (El 9 de Av), data trajika, diya de dolyo en kada anyo. Empesaremos kon el fakto ke puedemos konsiderar komo el primer Teshabeav de muestra istorya… Antes de entrar a la tierra de Kanaan, Moshe Rabenu mando espiones para mirar egzaminar el paiz ke van a konkistar, un delegado de kada Trivyo. Eyos tornaron en dizyendo ke la tierra era rika, fertila, de leche i de miel i mezmo trusheron un razimo de uvas tan pezgado ke lo yevaron enkolgado en un palo… ma adjustaron ke el puevlo ke mora es muy fuerte ke no es posivle de gerreyar kon eyos… Tu Moshe, mos kitates de Ayifto, para murir… Estos Shefes de Trivyos yoraron, yoraron… A estos djemidos les fue respondido (Esta noche estash yorando en vano, un diya vash a yorar de verdad en este tyempo. I era el 9 de Av. Por este pekado ke avlaron por la tierra santa prometida por el Dyo Barihu, va kastigar la vyeja jenerasion ke no va tener el zahud de entrar al payiz de leche i miel i solo la nueva jenerasyon va ayegar a este evenemyento.
2) En el enyo 586 A. J. el primer Bet Amigdash fue derokado por Babel Yerushalayim destruido.
3) En el anyo 70, el sigundo Beth Amigdash fue destruido por Titus del Emperyo Romano.
4) En 135, el dalkavo posto de Yehuda Masada fue destruido por los Romanos.
5) 1306 Los Judyos de Fransia fueron echados del paiz
6) En 1492, los Judyos de Espanya fueron egzilados.
7) 1670 deportados de Austria
8) En 1914 ampeso la Primera gerra Mundial
9) En 1929, uvo munchos tproblemes en Israel ke kavzaron la muerte de muestros ermanos.
10) En 1938-39 ampeso la sigunda grande gerra jeneral
11) El Primer treno ke yevo 104 Judyos a los kampos de Polonya salyo al kamino el 9 Av.
Keridos lektores kreyo ke ya abasta. Saveremos siempre ke unidos endjuntos puedemos luchar, kuando mos apartamos lo negro mos puede afitar.
Oguremos mas no bivir un Tishabeav. Pas i Amor i repozo bueno, Amen
