Kada vez vos eskrivo eskrituryas de viyaje. De los paizes i sivdades ande me fui i kamini. Tengo en la bolsa munchos lugares para kontarvos. Agora vos kero kontar un poko de las sivdades de la Turkiya. I un poko de los distritos de Estanbol. Munchos lugares kamini. Kaji 35 paizes i 130 sivdades en el mundo. A mi si me demandash, vos puedo dizir ke la mas ermoza sivdad del mundo es Estanbol. Tambiyen Napoleon pensava komo mi. El disho “Si el mundo entero era un paiz solo, la kapital se aziya Estanbol”. Mozotros la konosemos kon las palavras, La’argent La’argent, La’argent… Mas de esto ke ermoza palavra disho por Estanbol. Yo digo a mis amigos, "En Estanbol estamos bivyendo. El Estanbol no estamos bivyendo". Por esto ay munchas personas ke no konosen Estanbol. Ke lugares i sentros ay para ver i kaminar en esta sivdad? Ay personas ke no konosen mas del sentro ande biven i unos kuantos sentros ke se van para el echo o la eskola para komer i bever. Yo tomi unos kuantos tures de Estanbol. Por egzempyo, Beyoğlu & Galata, Kadıköy & Moda, Üsküdar & Kuzguncuk, Fatih & Balat. Ay munchas firmas ke azen estos tures. Si me demandash a mi vos digo kon la firma de Mois Gabay ke se yama “Istanbul Tükenmeden” es la mijor. Me esto akodrando kuando izimos el tur de Pera i Galata, empesimos de Taksim a kaminar. Ke apartamentos, ke pasajes, ke iglesiyas ke vimos. Ke konsejikas mos konto de los lugares de ande pasimos. Kaji 6 – 7 oras pasimos, komo una ora paso el tiempo.
Tambiyen el tur de Fatih i Balat estava muy enteresante. Yo nasi en Balat de ande salimos kuando teniya 6 anyos. Las Sinagogas, las kayes chikitikas, las botikas, el charshi estava muy savrozo kaminar i sintir las konsejas del giya.
Despues ke me kazi, pasimos a morar a Kadıköy, Göztepe. Kada diya me vo de Göztepe a Kadıköy para irme al echo. Me paresiya ke lo konosko este sentro. Despues ke tomimos el tur i kaminimos kon Mois Gabay, me ambezi ke no lo konosko este distrito. Ke karar de Djudyos biviyan en Yeldeğirmeni i en Moda? Ke kavzos uvo antes 80 anyos. La Sinagoga antika ke es de Haydarpasha? Komo dieron permision para ke se frague, etc.
Tambiyen el tur ke izimos de Üsküdar a Kuzguncuk fue muy enteresante. En kaminando entrimos al simiteryo de los Sabetayistes ke yaman (Dönmeler) i ke tombas konosidas vimos aya.
Komo estos distritos ay munchos tures. Vos rekomendo ke tomesh estos tures i vash a kedar muy kontentes a la fin del diya.
Viyajar es una pasion…
