Es oy, diya de Alhad, ke sintimos ke 6 de los arrevatados fueron matados por los militanes del Hamas en un tunel. 2 Mujeres i 4 ombres; todos mansevos. Ke pekado de ser matado 11 mezes despues de una perioda muy difisil, muy poko antes de sus libertad. Ya savemos ke uno de entre eyos era Israelyano i Amerikano. Reelmente grande pekado. La semana pasada, diya de martes, un ombre, Ferhan Kadi fue salvado kon una operasion realizada por las Fuersas Israelyanas en Gazza. Era una semana antes de muevo en Gazza ke toparon los kadavres de 6 otros arrevatados. Todos ombres. Si me akodro bien una partida de las mujeres de estas sesh personas fueron liberadas por los militanes del Hamas. Oy dospues ke estos 6 arrevatados muertos fueron trayidos a Israel, los paryentes de los arrevatados se arekojeron para protestar el Governo i el Primer Ministro. I a la fin, en la avenida eskrivyeron los nombres de todos los arrevatados ensima del kamino. I el Governo embiyo dos kamyones kon tinturas para azer dispareser lo ke esta eskrito. Agora estan eksplikando ke estos 6 arrevatados de oy fueron matados 48-72 oras antes ke fueron topados. Si puedesh oyer lo ke estan avlando los responsavles del Hamas, es kompletamente diferente i eyos no izyeron nada. Reelmente en esta situasion bastante difisil, no lo kero dizir, ma dainda los Israelyanos van a pueder pedrer las almas de otros arrevatados. A la fin de un anyo dospues, el destino de la majorita de los arrevatados va ser eskrito. Oy onze mezes, 33 diyas dospues el evenimyento del 7 Oktobre 2023, estamos dainda diskutiendo la situasion de los rehenes.
Penso ke sin dinguna pas, este problem puede ser resolvido. Oy se puede matar la mas grande partida de los militanes del Hamas i sus lideres. Ma los mansevos i los chikos se estan edukando kon una enemistad kontra el puevlo Israelyano i Djudio. I estos mansevos se van a engrandeser i kada diya kon mas enemistad. El primer Ministro mizmo si tyene razon, no deve serrar todas las puertas para la PAS en el Medio Oriente.
Los nombres de los arrevatados ke fueron eskritos en la avenida i dos kamyones ke vinyeron para alimpiar lo ke esta eskrito en basho.
