Mezuza: Se enkolga enriva de los postes de las puertas de la kaza. Mos aze akodrar la prezensia del Dio i de sus mitzvot. La mitzva de enkolgar mezuzas se deriva de la Shema. Las palavras de la Shema se eskriven en un chiko rulo de pergamino. El Dio mos ordona de mantener sus palavras en muestro meoyo i en muestro korason en eskriviendolas. El rulo deve de ser eskrito a mano kon un estilo de eskrituria espesial. La kasha ke kontiene el rulo se enklava al posto de la puerta al lado derecho. Kuando tokas la mezuza, bezas los dedos ke la tokaron, ekspresando amor i respekto al Dio.
Tzitzit i Talit: La Tora mos ordona de meter tzitzit en las kuatro puntas del talit por akodrar las mitzvot. Los ombres se visten un chal de kuatro puntas yamado talit en los servisios de demanyana. Se resita una bendision kuando se meten el talit. El talit solo, no tiene una sinyifikasion relijioza, es los tzitzit en las puntas del talit ke akodran las mitsvot.
Tefilin: La Shema tambien mos ordona de atar las palavras a muestras manos i entre muestros ojos. Atamos estas bolsas de kuero ke kontienen rulos de pasajes de la Tora, a muestros brasos i a muestra frente, porke muestro meoyo i muestra fuersa fizika son los ke aplikan las mitzvot.
Menora: Uno de los semboles de la kreensa judia es la menora. La menora es un kandelar de siete brasos ke se utilizava en el Templo. Los kohanim asendiyan la menora en el abrigo kada noche, ramplasando las mechas i adjustando azete de oliva freska en las kupas. La menora es un sembol de la nasion de Israel. La menora de mueve brasos ke se utiliza en Hanuka tiene komo modelo esta menora, porke Hanuka komemora el milagro ke es, "la azete de un dia turo ocho dias".
Kipa: Los judios empleyan la kipa para kuvrir la kavesa. Kuvrir la kavesa es un sinyal de respekto. En la epoka medival, los judios se kuvrian la kavesa porke kreiyan ke el Dio esta enriva de eyos. Kuvrir la kavesa no es relijiozamente ovligatorio.
Magen David: El Magen David, la Estreya de David, es un sembol de la unidad del Dio. El Magen David reprezenta la forma del eskudo del rey David. El triangulo superior se espande asta ariva, asta el Dio, el triangulo inferior se espande asta abasho, asta el mundo real. Los triangulos son inseparavles, komo el puevlo judio. Los tres lados reprezentan los tres tipos de judios: Kohanim, Levitas i Israel. Los 12 lados (3 eksteriores i 3 interiores en kada triangulo) reprezentan las 12 tribus. Kuando se fondo el estado de Israel, uvo muncho debate sovre si este sembol se iva utilizar en la bandiera. Oy, el Magen David es el sembol rekonosido del judaizmo.
Hay: Este sembol es la palavra ebrea Hay (vida). Hay reflekta la importansa de la vida. El konsepto de hai es emportante en la kultura judia. La sinyifikasion de l'hayim es (por la vida).
Mano de Hamesh: La mano de Hamesh es un motivo popular en la djoyeria judia. En los kolares i maniyas, a la punta se meten esta mano. La mano tiene un ojo en el sentro. Esta mano reprezenta una proteksion kontra el ojo malo.
