El rey de Fransia Louis XIV o el “Rey Sol” era el rey ke reyno mas munchos anyos ke los otros.
Komo kada rey, i el teniya sus kaprichos, ma siguro kada uno teniya fantaziyas. Mizmo el vistir i dezvistir era komo una seremoniya. Todos los mosos privados eran nobles. Era grande privilejio de vistirle las kalsas. Otro le vistiya la kamiza i mas. No eskapo, aviya i otros nobles ke viniyan espesyalmente para mirar estas seremoniyas. El ken viniya al lado del rey, tomava una onor espesyal. Si algun diya estava el tiempo ennuvlado i en la kamareta ande se topava el rey, no aviya bastante luz, aviya personel ke deteniya los kandelares para aklarar. I eyos tomavan un titolo noble. Para ke no ayga algun kavzo de revolusyon, Louis ovligava ke todos los nobles bivan en el palasyo, debasho de su kontrol. Estos nobles se komparavan kon sus vistimyentas i aziyan konkurso, ken se va vistir mas shik i mas karo. Ansina uvo munchos nobles ke fayitaron.
A este rey le plaziya muncho komer. La demanyana komiya solo, ma al entorno teniya munchos observadores. Estos eran los ke miravan kuando se vistiya o dezvistiya. Ma a la kontra, las noches aviya pransos rikos. Diezenas de shefes aparejavan diya entero las komidas las mas savrozas. Dizen ke el rey no se artava nunka. Komiya i komiya. Le plaziya muncho komer karne. Todo modo de karne, ma ampesava kon karne frita. Komiya munchas sortes de karne i al lado, palomas, indianas, falkon, midyas i todo modo de produktos de mar. Por savor de boka komiya siempre una portokal karamelizada kon ojas de oro. Louis komiya todo kon sus manos. Era defendido de meter kuchiyos a la meza por modo del espanto ke lo pueden kuchiyar.
El se keriya muncho bien. Se admirava muy muncho. Por esto el palasyo entero era yeno de sus portres. Durante su 72 anyos de su reynado, se izo azer mas de 300 portres. Esto era spesyalmente echo para ke en todos los lugares ke se akodren de su prezensya. Tambien kaliya amostrar respekto a estas figuras. No se deviya de aboltar la espalda a estos portres.
En el anyo 1715, Louis 14 se muryo de kangrena. Tuvo una lezyon en la pacha. Los doktores kijeron kortar la partida enfektada, ma el refuzo porke disho ke es dezonorable. Akel tiempo puediya bivir mas munchos anyos. En lo ke muryo teniya 76 anyos.
A los ke estavan al entorno de su kama, antes de murir, les disho: “No yoresh! Pensavash ke yo iva bivir asta la eternidad?”
La tomba de Louis 14 se topa en el simeteryo de los reyes, en la bazilika de St. Denis. En la revolusyon, el puerpo fue kitado de aya i fue dispersada por aki por aya.
