Kuando saldras a la gerra kontra tus enimigos, el Kriyador los entregara en tu mano. Rabenu Bahye en su livro “Hovat elevavot” konta dizyendo: Un haham vido soldados ke estavan tornando de la gerra, borrachos de la viktorya ke ganaron, i glorifikandosen kon grandeza. El haham les dize: porké estash tan alegres i gustozos? La gerra ke ganatesh es una gerra chika i muy fasil. La gerra ke vash a enpesar agora es muy grande i difisil. Venser otras personas es muy fasil, ma la persona ke puede venserse a si mizmo es el baragan.
De este chiko pasaje entendemos ke la perasha “Ki Tetse” no esta tratando solamente de la gerra ke gerreyamos kada ora i punto kon muestro apetite al malo i los sintimyentos non buenos. La gerra ke se aze kon los enimigos es por arrezyar el estado i la libertad. Kontra esto, la gerra ke se aze kontra nuestro apetite al malo es por nuestra buendad en partikular; es por la buendad de pueder afirmar las enkomendansas verso el Kriyador. El Kriyador nos prometyo dizyendo komo vos komportash kon mi i yo me vo konportar kon vozotros. Komo esta dicho en el verseto de la perasha; kuando vas a salir a la peleya, el Kriyador te dara a el enimigo en tu mano. Ma kon una kondisyon: si tu puedes venser a tu apetite. Estonses vas a salir a la peleya, i vas a tornar a tu morada en pas.
La unyon de la nasyon es muy enportante para la egzistensya de el puevlo. Komo el peshkado no puede bivir sin agua, el bivo no puede egzistir sin respirar. Ansi sin tener unyon no puede egzistir un puevlo. El puevlo deve de estar aunado komo un kuerpo i una alma.
Entonses prospera i adelanta. Entre la djente deve de reynar pas i verdad, amor i ermandad.
En kuatro perashiyot en la Tora, se trata el sujeto de la peleya. Prima, kuando vas a salir a la peleya i vas a ver kavayos i armas, i puevlo muncho, no te espantes porke el Kriyador esta syempre kon ti; segundamente, devemos de guadrar nuestra alma en la gerra djunto, las almas de los enimigos i por esto dize en la Tora “vas a apreganar la pas”; treseramente, no solamente te vas a apiadar de las personas sino de los arvoles de fruto, porke es el mantenimyento de el ombre, no puedes danyar ningun arvol de fruta. Kuatro: deves de konportarte kon djustisya.
En estos diyas de piadades ke nos topamos en el mez de Elul miraremos i azeremos esforsos a venser a nuestros sintimyentos non buenos. Konoseremos nuestros defektos i los desharemos.
Le disheron los elevos a un sinyor haham nombrado R. Naftali: Sinyor ke nos de un konsejo bueno, konsejamos preados, debasho de muestro apetite al malo. El Rabi les responde dizyendo: Yo esto siguro ke el apetite malo no va presigir a vosotros, todo tyempo ke vosotros no andash detras de vuestro apetite al malo.
De este dialogo puedemos entender ke todo esta dekolgado, en la veluntad de el ombre. Nozotros si echamos un paso derecho, el Kriyador nos ayuda a kompletar i a azerlo bueno. Komo esta dicho: Vosotros avrime un burako de la alguja, yo vos va avrir a vosotros puerta de palasyo, dize el Santo Bendicho el.
