En ebreo “Ha’ir Haaduma” es una munisipalidad ke se topa en el distrikto Kuba, de Azerbaidjan. Es tanbien yamada en ruso Yevreiskaya Sloboda ke kere dizir “Sivdad Judiya”. La yaman tanbien “Yerushalayim del Kaokaso”.
Deke es yamada “La Sivdad Kolorada”? Porke todos los tejados son kuvridos kon tejas muy koloradas.
Se kreye ke esta sivdad es la unika sivdad judiya del mundo afuera de Israel i los Estados Unidos. Tienen una lingua espesial ke se yama “Tat” o “Juuri”. El puevlo avla tanbien el ruso i azeri. Tienen dos eskolas; la una da edukasyon en ruso i la otra en azeri i dan una edukasyon bazada sovre el judaizmo.
Antes 300 anyos, el governante, Feteli Khan de esta zona, les dyo este lugar al lado del riyo, a los judios, para ke los judios de esta rejion puedan bivir aya sin espanto de persekusyon. I era muy bueno para los judios tanbien de otras partes de aldoredor ke tanbien eran torturados, i vinieron a establesersen aya. Aki fraguaron un ponte de tavla i ansina konektaron la Sivdad Kolorada al distrikto de Kuba. En este chiko kazaliko situado en las montanyas, moran 3000 personas. De aki salieron tres milyonaryos ke se yaman Gad Nisanov, Germen Zacharyayev i Zarakh Iliev.
La Sivdad Kolorada tiene sus tradisyones judiyas. Las mujeres se tapan las kavesas, los ombres meten kipas i todos se kitan los kalsados i se meten pantoflas para entrar a sus kales porke en basho tienen tapetes muy presyozos i muy valorozos. Teniyan 13 kales, ma agora solo 8 de eyos son konservados. Solo dos kales son aviertos el uno es el kal "Hilaki” ke fue fraguado en el anyo 1896 i el otro es “La grande sinagoga Altı Günbaz” ke fue fraguado en 1888 i renovado en el anyo 2000.
Este kazal se topa al lado de un rio ke djusto enfrente, de la otra parte se topa un kazal ande biven muzulmanos. De una parte se ve la sinagoga i de la otra parte se ve la meshkita. Todos biven en pas ay siglos.
Los judios ke fuyeron de sivdad en sivdad por modo de los pogromes i las persekusyones estan muy muy orozos de saver ke no tienen mas de fuyirsen de sus payizes.
