En el anyo 1928, Stalin propozo de krear una rejion nasional judia en Birobidjan, una sivdad situada a 8400 km de Moskova, serka de la frontiera de la China. En el anyo 1934, Birobidjan resivio su estado ofisial komo Rejion Otonoma Judia. En el anyo 1937, biviyan 37000 judios en la sivdad. En el anyo 1991, duspues ke los estados de URSS se dispersaron, una grande partida de los rezidentes de Birobidjan emigraron a Israel, a la Amerika a la Evropa. En el anyo 2021, 4000 judios kedaron en Birobidjan. Segun el artikulo 65 de la Konstitusion rusa, Birobidjan es la sola rejion otonoma de Rusia. Es una de las dos juridiksiones judias ofisiales del mundo, la otra es Israel. Es la sola rejion del mundo ande el yiddish es la lingua ofisial.
Birobidjan es el nombre de los grandes rios de la rejion; el rio Bira i el rio Bidjan, ke son los brasos del grande rio Amur.
Segun Rabbi Mordechai Scheiner, siendo el Grande Rabino, los judios se estan sintiendo en seguridad porke no ay antisemitizmo en Birobidjan. Scheiner es tambien el proprietario de Yiddishkeit, un program en la televizion de Rusia.
La Sinagoga Birobidjan avrio sus puertas en el anyo 2004, para markar el setentien aniversario de la fondasion de la Otonoma Judia.
Este grande komplekso inkluye una eskola relijioza ande los elevos estudian en yiddish i ebreo, una biblioteka, un muzeo i seksiones de administrasion. La komunidad judia fue dirijada por Lev Toitman, fin ke Toitman muryo en Septembre del anyo 2007.
La kultura judia es la mas vieja de los otros lugares de Rusia. Teatros en Yiddish fueron establesidos en el anyo 1970. Las tradisiones judias son parte del program de las eskolas publikas.
El governador de la sivdad, Nikolay Mikhaylovich, deklaro su entision de dar su apoyo a kada mueva organizasion judia.
En el anyo 2007, el Primer Program Enternasional de Enverano Birobidjan de la Lingua i de la Kultura Yiddish fue fondada en la Universidad de Bar Ilan en Israel. El profesor Boris Kotlerman esta dando estos estudios en yiddish.
La komunidad judia fondo Asosiasiones por los mansevos i por los viejos; tambien un grupo de bayle, una gazeta en Yiddish. Un festival de la kultura judia se esta organizando kada anyo. Por la selebrasion de Hanuka del anyo 2007, los fonksionarıos de Birobidjan, konstruyeron la mas grande Menorah del mundo.
La Universıdad Nasional de Birobidjan lavora en kooperasion kon la komunidad relijioza. Esta universidad es la sola universidad del Leshano Oriente de Rusia. La baz del kurso de formasion es el estudio de la lingua ebrea, la istoria judia i los tekstos klasikos.
Una eskola publika judia avrio una mestra i una eskola relijioza. Las kreaturas de sinko a siete anyos tienen dos lisyones de yiddish kada semana i se ambezan a avlar en yiddish; se ambezan tambien los bayles, las kantikas i las tradisiones judias.
En el anyo 2003, la komunidad judia aparejo un filmo dokumentario, "L’Chaim Kamarada Stalin". Este filmo esta kontando la kreasion de la Otoridad Otonoma Judia por Stalin i su solusion para protejar los miles de judios rusos. En este filmo, aparte de la kreasion de la patria de los judios rusos, ay senas de la vida de oy de Birobidjan, i reportajes kon los rezidentes judios.
