Intelijensia artifisyal. Muevo tema de la umanidad. El mundo entero esta avlando de esto afilu los ke konosen bien el tema o afilu los ke no saven nada. Todos estan avlando. Mansevos i aedados. La una parte dizen ke es el monte de la sensya, i la otra parte dizen ke es el fin de la sensya umana. El fin del mundo.
No savemos kualo va trayer los diyas ke van a vinir. La razon de la egzistensya umana es ke puede azer elementos para bivir. Del diya ke esta en el mundo, para protejarse, kale ke este en una komunidad. Kale ke se abrige bueno, despues izo kuchiyo, topo la lumbre, izo la karucha. Se mantuvo de la tyerra. Esto es la istorya de la persona desde ke nasyo dependiente a su madre fina ke seya independiente. Otros bivos nasen i se alevantan en pies, topan su mantenimyento de si para si en poko tiempo. Ma el ser umano no es ansina. Por esta razon siempre kaliya ser kapachi para bivir, para mantener, para egzistir. Siempre tomo egzemplos de los bivos ke ay en el mundo. Izo aviyones, se bolo komo los pasharos. Izo vapores, nado komo los pishkados. Vino diya, un virus negro, chiko, ke no se ve kon los ojos lo derroko. Ma syempre salyo a bash kon los peligros.
Los elementos ke utilizo en las epokas nunka no kedaron mizmos. Syempre se adelanto a mas presto, a mas livyano, a mas i mas adelantarse. Oy en diya es tiempo de adelantamyento del viejo. A poko a poko la adaptimos la intelijensia artifisyal a muestras vidas. Puedeser emprimero kon las makinas de kalkular. Kon las makinas de las fabrikas, las komputadoras ke eran boy de una kamareta oy en diya estan boy de mi mano. Kuando estamos demandando al Senyor Google una demanda mos esta plazyendo ke estamos tomando la repuesta en supito. Mos esta plazyendo sin ir al supermerkado azer empleo, mos esta vinyendo muy fasil. Ni un minuto no puedemos pasar sin internet. Las bankas, las fabrikas, la komunikasyon todo depende del internet. Dingunos no dizen oy ke el internet va trayer el fin del mundo. Ama si no saves, te espantas. La intelijensia artifisyal oy es esto. Si no savemos, si no mos ambezamos mos vamos a espantar. Por esto kale ambezar. La intelijensya artifisyal si esta mas intelijente de mozos, kale ke pensemos komo la vamos a dirijir. Kualo kale azer? Kualos ofisyales van a parvinir a dirijir? A kualo se esta evolusionando el mundo? En kualo kale tomar edukasyon? La djente ke no va parvinir a desveloparsen komo se van a mantener?
Lo ke penso es, el desvelopamyento no se areta, es mozos ke kale ke ayegemos a la situasyon.
