La ora ke la oruga (tırtıl) penso ke ya le vino la fin se konvertyo en maripoza.
No serres el livro imedyatamente, la esperansa puede estar en la pajina de alkavo.
Si las nuves estan en el syelo, no peryas la esperansa ke dospues va briyar el sol.
Keridos lektores, estas palavras las meldi en un livro kontenido de esperansa. Pensi ke en estos diyas, todos mozotros estamos asperando la fin de esta maldicha gerra ke mos empresyono la vida. De kuala nasyon ke kere ke seya, mas ke no se mueran dingunos, ke no yoren las madres, las mujeres, las kriaturas.
Tenemos esperansa ke en el anyo muevo 5785 (para mozos 2024 ya eskapo), vaya i no venga, todo lo negro va kedar aya i lo vamos a kontar en bueno. Yo kreyo ke kon la mitzva del shofar i kon la orasyon kolektiva ke vamos azer diya de Roshashana, se van a afirmar todas las orasyones i las esperansas, AMEN.
Tanto eskurese es para amaneser.
Entraremos al anyo muevo kon moral, kon esperansa i en riyendo kon una anekdot.
UN CHIKO PEKADO
Un mansevo vyene a la kaza de un rabino i le dize:
---Sinyor haham, yo ize un pekado muy grande, kualo puedo azer para pardonar
El rabino le demanda
---Komo de pekado?
---No ize netilat yadayim, no me lavi las manos antes de komer
---Si, pekates ma es pardonado si no lo azes otruna vez. Kreyo ke no te olvidates de dizir la beraha de dospues de komer?
---No sinyor haham, no dishe, porke aviya en el entorno otra djente ke no eran djudyos, me averguensi de dizirla.
---Kualooooo? Komites en un restorante ke no era kasher? Komites trefa?
---Si sinyor haham, komi trefa
---Deke? No esto entendyedo en esta sivdad ay miles de restorantes kasher!
---Eh, sinyor haham, todos los restorantes kasher estavan serrados.
---Todos? Ni uno no estava avyerto? Komo puede ser?
---Si sinyor haham, todos estavan serrados, porke era diya de Kipur!
SHANA TOVA U METUKA.
