Antes la kaleja miya biviya 24 oras, diya i noche, no komo agora, ni guerko esta pasando. Me vyene al tino, i empeso a akodrarme kuando era chiko, komo era la kaleja miya.
En kada punto pasavan unos vendedores. De la demanyana fina la noche era komo un festival la kaleja miya. Lo mas muncho me plaziya kuando pasava el shekerdji ke vendiya unos bonbones de gayo, en Turko se yaman Horoz Şekeri, i al lado aviya bonbones de chuflete, de kantaro, i de mansana; todo era kolorado.
Kuando viniya a la kaleja el lonso, kon el djugador todos mos arekojiyamos en el entorno del djugador, i empesava kon el pandero a dizir, las mujeres komo se dezmayan en el hamam, i el lonso empesava a baylar, i dospues se echava en basho. I mozos, riye babam riye. El shekerdji ke vendiya halva de algodon, en Turko es Pamuk Helva, kuando viniya a la kaleja korre babam, presto tomaremos sin ke se eskape. Kuando empesavamos a komer, la halva era emmelada, todo se apegava a la nariz i al entorno de la boka.
Las halvachichas teniyan otra savor, kuando era enverano, vendiyan kon dondurma, la kampana kuando oyiyamos es ke esta vinyendo el yogurtchi, i la ora es 5.
Todos saliyan a la ventana kon los chinis, i el Yogurtchi ken ke kadar kere saviya,
teniya una kuchara spesiyal, kon la kuchara kortava el yogurt, te parese ke esta kortando karne, este modo de ermozo lo kortava i enriva del yogurt metiya un dedo de kaymak.
Kada diya pasava madjundju, madjun es komo un gomo emmelado de asukar, i es kolores, kolores de fruta, enriva de un chiko palo lo apega el madjun i empesas a chupar; era muy ermozo, komo karamela.
El turshudji viniya kon su araba de tres karuchas i enriva de la araba aviya kavanozes: kavanoz de kol, de pipino, de pandjar, de domat vedre. Vendiya kon kupas, de kualo keres, lo metiya eryento de la kupa i kon un piron, lo komiyamos kon grande savor. Demanyana a las 11-11.30 pasava un vendedor kon un azniko; el azno teniya 2 kufikas i aryento aviya azete, agro, sos domat, i sos de pimyenta kolorada, empesava a gritar; nada no entendiyamos, solo a la fin domatchiiiiiiiiiiiiiii diziya, ya entendiyamos todo.
Pasava yorgandji, los algodones los chafteyava, teniyamos kalaydji lo aziya las kalderas djaspe. Un naylondju pasava kada diya, vendiya de plastik legenes, kuvos,
mandalakias, djarros, i si keres kon las vistimyentas vyejas aziyas trokar, kon un legen u kon otra koza. Antes diziyan madjaroz, es polvo de leblebi (stragalakya), i pasavan de la kaleja, vendiyan aryento de unas chikas torbas, i lo metiyamos a la boka, kuando avlavamos kon uno, todo el polvo viniya a su kara, i mos pishavamos de riyir.
Mos plaziya dulse de roza mi madre ke este en ganeden lo aziya muy ermozo, kuando viniya el tyempo pasava un vendedor kon un sepet aryento aviya rozas para dulse i la kolor era roz, enriva de las rozas aviya un torshon ke era un poko mojado, para ke las rozas esten freskas. Kuando viniyamos de la eskola era medyo kanton de pan i aryento domat i pipirushka i a la kaye a djugar. El bozadji, el salepchi pasavan la noche. Kuando empesavan los chufletes es ke ya se eskapo el diya porke estan pasando los bekchis, i nochada buena.
Agora nada no kedo, solo los patirdis de las kazas porke estan en derrokamyento para renovelarlas. I todo la ermozura de lo vyejo aryento de lo muevo se esta desparesyendo, kon todas las memoryas.
I yo esto gritando, ANDE ESTA LA KALEJA MIYA?
