El dia de la “Viktorya” es una fyesta nasyonal ke tyene una grande emportansa nasyonal i istorika para la nasyon turka. Esta festividad reprezenta uno de los puntos ke no se puede trokar, uno de los mas emportantes de la gerra de la independensya turka. Semboliza la grande viktorya kontra los invasores gregos kon el lider “Atatürk”.
Es una ekspresyon de la determinasyon de la nasyon turka, en la lucha por la independensya i la liberta.
Esta lucha, refleta la velunta de la nasyon turka de protejar su onor, independensya i liberta nasyonal.
Es un dia en el ke las personas se aunan, se solidarizan i enfortesen el esprito de la unidad nasyonal i muestra fe en el futuro.
En la izla de Burgaz ay dos klubes.
“Burgaz Deniz Spor Klübü” es el klub ke 90% son djudyos. Este klub es komo muestra sigunda kaza ande somos komo una famiya.
En el 30 de ogusto, la demanyana a las 10 mos arrekojimos en el klub. 10.30 aviya la komemorasyon delantre del busto de “Atatürk”. Aviya puede ser 100 kriyaturas, las madres, los padres, todos vistidos korolados i blankos la kolor de la bandyera turka, kantando los imnos todos endjuntos. Todos en pyes sin azer un bruido izimos un punto de omenaje, i despues los klubes metyeron rozas al busto de Atatürk. Fotografias, kantes, todo estava muy sentimental.
Despues aviya kompetisyones de natasyones, chikos, grandes, madres, padres i a los ke ganaron les dyeron madalyas.
La nochada fue una maraviya, una nostaljiya ke mos akodrimos de las nochadas de antes 40-50 anyos.
El klub se fondyo en el anyo 1934 i para selebrar los 90 anyos, fue una organizasyon inolvidavle.
La entrada al klub fue por la puerta de la guerta, ornada de rozas i flamas multikolores ornadas kon una illuminasyon kon ampules chikos. Di ke entrimos a un palasyo enriva de un tapet blu delantre la mar. Kaminando avagar avagar 2 mansevas ofresiendo limonatas i shokolatas.
Las luzes i la dispozisyon de los asientos fue muy reushido.
En primero una manseva i un mansevo avlaron para pueder dar una idea sovre lo ke se va pasar.
Despues lo yamaron al presidente ke izo una avla kurta i empeso a distribuir las madalyas a los ke ganaron en munchas kompetisyones diferentes.
Una orkestra ke emosyono a todos kon las kantikas de los anyos 1960-70-80-90, todos baylaron muy alegres.
El klub dekorado kon fotografias pretas i blankas de antes 30-40 anyos ande todos estavan mansevos.
Lo ke me emosyono lo mas muncho fue ke un dirijente
“Alp BENBANASTE” tomo la poezia de “Meir GAON” mi marido (z.l.) eskrita por la isla Burgaz, porke el era amorozo de Burgaz; la enkuadro i la enkolgo a la entrada del klub en dizyendome ke es: “el 90en Aniversaryo del klub i ke kale komemorar “Meir GAON” ke era una persona muy presyoza i popular, todos lo keriyan muncho byen”.
Me toko tanto de ver esto, ke empesi a yorar. Mersi muncho
“Alp Banbanaste”, sos un mansevo muy kerido i sentimental.
Entremientes se fyesto i los ke teniyan 90 anyos en dandoles una plaket.
Fue un djesto muy konsiderado por los aedados ke vinyeron kon siyas, (los ke no puediyan kaminar), kon baston i kon walker.
Kero felisitar a todos los dirijentes del klub ke mos izyeron akodrar lo vyejo ke estava muy nostaljik.
