Estas dalkavos semanas meldi un livro eskrito por Delfine Horvilleur Haham
Mujer, de la Asosiasion Judaika de Fransia. Este livro donde el teksto es orijinal, yeno de umor, de sufriensa i de esperansa fue kompozado despues de los evenimyentos del 7 Oktobre, komporta 10 konversasiones, siertas kon imajinerias, siertas kon las personas desparesidas, kon sintimyentos de dolor i tristeza profonda.10 dialogos kon keridos komo kon el poeta Israelyano u palestinyano kon Claude François i Albert Kohen ke mostra una esperansa i fey en el avenir i el sueto ke kada uno de mozotros seya “Una luz en la noche, una kandela en las oskuridades”. Este livro Comment Ça Va Pas? es tambien yeno de tekstos Biblikos.
Komo la lucha de Avraam kon un andjelo, ke le dara el nombre de Israel “ke gano la lucha kontra la fuersa brutal, ma fue chafteyado de la ansha ke lo desho flako en su puerpo. Este teksto es yeno de terminos de Yidish ke mos da un aspekto de la Evropa santral i del Getto.
Veremos su Nona ke guadra su aspekto de mujer ke bive en Fransya, i su Nono ke es Fransez sien por sien, en sus altos estudyos, tyene su amor (Malgrado el Rasizmo) por la Fransya. Vemos el dialogo de Delfine kon sus kriaturas, renkontras kon elementos Palestinyanos, komo kon Israelyanos. Meldamos un poema de Mahmoud Darwish, poeta Palestinyano, komo palavras de Yehuda Amishai, poeta İsraelyano. El dalkavo dialogo es kon Mashiah donde asperamos su vinida. Su biervo sinyifika no solo (El ke es untado de azete sakra) ma tanbien kere dizir avlar, konversar. Los dalkavos biervos de la Haham Delfine Horvilleur: La esperansa ke las dos rasas, dos puevlos ke topen en avlando i no en peleyando un akordo de Pas. Comment ça va pas? Un livro chiko ma grande kon sus penseryos, sus lagrimas, su esperansa de una vida mijor en Pas i Amor sin dinguna inimistidad, sin el rasizmo del antisemitizmo. Una vizyon del futuro ke asperamos de todo el korason. Keriya darvos una mas grande analiz de estas ojas.
Vos oguro i oguro a todos de mozotros, de ser una kandela en la noche komo lo suetava Delfine Horvilleur en estas ojas de Comment ça va pas? eskritas despues del 7 Oktobre.
En este mez de Elul, mez de Rahamim, Dyo Santo damos le fuersa i la bindisyon ke toda la umanita se ate komo una kavena de repozo bueno i alegriya en los korasones.
