I sera ke kuando vendresh a la tyerra prometida ke El Kriyador te da por eredar, i la eredaresh, i moraresh en eya, tomaresh de todos los primeros frutos de la tyerra, i las pondrash en un sesto, i andarash al lugar ke El Kriyador eskojera ayi su nombre, i vendrash a el Koen ke fuera en akeyos diyas. I tomara el Koen los frutos, i los pondra delantre de la ara del santuvaryo de El Kriyador.
Kualo era el eskopo de esta enkomendansa? En akeya epoka kada uno i uno aziya su orasyon sigun se konsintiya en si, i denusyava a El Kriyador, todos sus dezeyos de su korason en dando los primeros frutos a el Koen en el santuvaryo delantre de El Kriyador, en orasyonando i akseptando ke todo lo bueno ke el poseda es una dadiva de El Kriyador bendicho El. El savyo Arambam en el livro ‘More Nevuhim’, trae una razon por esta enkomendansa dizyendo: “Aregalar los primeros frutos es enforteser la persona en si mizma la natura de jenorozidad i apokar sus dezeos de su alma”.
Tambien en esta mitsva, la enkomendansa ambeza a el ombre de ser umilde. Akeya persona ke es patron de kanpos i vinyas el mismo esta tomando el sesto de frutas en su ombro, i se lo esta yevando a el santuvaryo a darselo a el Koen. Dunke este djesto aziya akodrar ke nozotros fuimos esklavos en Ejipto a Paro, i agora El Kriyador nos dyo muncho bueno i rikeza. Komo lo meldamos en la perasha Ekev, “No seya ke komeras i te artaras, i fraguaras kozas buenas i moraras en eyas, i tus ovejas se muchiguaran, i plata i oro posedaras. En este estado seya enaltesera tu korason i te olvidaras del Kriyador. Aze muncho atansiyon en el tyempo ke estas en la bondansa, de akodrarte ke El Kriyador tu Dyo, es ke te da fuersa por azerte reushir en tus lavoros”.
Oy ke no tenemos la enkomendansa de Bikurim, los primeros frutos, no devemos de olvidar la mitsva de tsedaka, la tsedaka balda las setensyas fuertes. La tsedaka eskapa a la persona de la muerte. Komo lo disho Yirmiau, el profeta de boka de El Kriyador, “aze tsedaka kada uno sigun su posibilidad, komo yo ago kon vozotros, ansi baldare todas las setensyas”.
