Ay sivdades ke kero ver i me vo para kaminar i konoserlos. I ay sivdades ke me vo por ke so ovligado, komo para vijitar los Fuares i para partisipar en los konsiertos a los kualos semos invitados. Frankfurt es un sivdad ande me vo por los Fuares ke se azen aya. Para mi no es sivdad muy turistika, ama kuando me vo aya tomo muncho keyf. Despues ke me fui aya unas kuantas vezes solo, le dishe a mi mujer, kerida keres vinir kon mi? Me va irme a Milano, Paris, Frankfurt i a Viyana porke ay Fuares. Siii, komo no, me disho. Empesi azer el program ke vamos pasar 10 diyas endjuntos. Ya saviya ke le va gustar Milano i Paris. Por Frankfurt no estava siguro si le va plazer. Kada vez ke me vo a Frankfurt me kedo en el Otel Topaz ke es en el sentro de Hauptbahnhof ke es la istasyon de los trenos. Porke estava mi mujer, Diana kon mi, aparti el Otel Plaza en el sentro de Frankfurt. De ke arivimos a Frankfurt no se de ke no le dio la grasia muncho. Ama a mi me plaze este sivdad. Kada vez ke me vo, absolutamente me vo a Römer. Aki es un sentro ande las kazas i la arshitektura es komo el viejo Frankfurt. Se yama Old City. Detras de este sentro se topa la kaye ke es serrada al trafiko, ke se yama Zeil Strasse. Kada diya vengo a lo manko una vez a esta kaye. Aki se topa el magazen grande ke se yama Galeriya Kaufhof. Esta kaye i sentro kaminimos kon Diana. Komimos aki en un restorante muy otantiko. La djente mas muncho estavan komyendo sosis ke se yama aki Frankfurter al lado kon kol i salata de patatas. Siguramente por bevyenda bira. El diya ke arivimos lo pasimos ansina.
Al diya sigiente salimos a la kaye para kaminar un poko. Otruna vez mos fuimos a Zeil i a Römer. Entrimos a la botika Kaufhof. Merkimos unas siertas kozas para las ijas. De aya mos fuimos a la Opera ke es en la istasyon del metro Alte Oper. La kaza de Opera es una edifisio muy ermozo de ver. De aki en kaminando vinimos a Sachsenhausen. Aki las noches son muy yenas. Aki se topa las diskotekas, restorantes i bares. La manseves viene aki para baylar, komer i bever. Aki puedesh ver la kultura de los mansevos almanes. Todo modo de tipo puedesh topar aki. Mozotros porke mos fuimos en las oras de despues de midi no estava muy yeno i no estava muy enteresante.
De aki mos fuimos kon Metro a la Sianagoga. En dizyendo Metro, kon el metro de aki vos puedesh ir de un lado al otro muy presto i kolay. Ya se puede ir en kaminando a la Sinagoga ma mozotros mos fuimos kon Metro. Para ver el sistem i las istasyones de aki. Kuando arivimos a la Sinagoga entrimos sin problem porke era ora de Minha i Arvit. En salyendo mos dieron unas kuantas informasiyones por la Sinagoga i los djudyos ke biven en Frankfurt. En saliendo de la Sinagoga, kaminando vinimos a la kaye Zeil. Aki ay Botikas, Bistros i kafes para komer. Aryento de 3 diyas este kadar podimos kaminar i ver. No pensesh ke ay mas muncho de ver en Frankfurt. Los lugares turistikos son este karar kreyo. Ay unos kuantos muzeos i la Katedral de Frankfurt es de ver. Siguro ke kale mensionar el rio Main ke pasa en medyo de la sivdad ke mete la alma a Frankfurt.
Viyajar es una Pasion…
