Lina Filiba
La biblioteka del Instituto Salti en la universidad Bar Ilan, el 15 Septembre 2024 dia de alhad, aresivyo a los estudiantes i a sus famiyas emosyonadas, los kualos resivieron bekas (burses) meresidas.
La fundasyon Yehoshua Salti, fondada en 1983 komo en su pasado, en su 42en aniversario apoya a los estudiantes de orijin turka i de los payizes Balkanikos para sus estudyos en las universidades de Israel.
El dekano de la Fakuldad de estudyos djudyos i direktor fundador del Instituto, el Prof. Shmuel Refael partajo kon los estudiantes i sus famiyas la komun posesión ke tenemos de la kultura sefaradi i de su lingua, el ladino a las kualas se deven dar la importansa nesesarya i de mirar a transmitirlas a las jenerasyones venideras.
El envitado darson de la seremoniya, el Dr. Hay Eytan Kohen Yanarocak en su avla konto ke el izo aliya de Turkiya i ke sus estudyos de M.A. i de doktorado fueron koronados en las universidades de Israel. Durante la peryoda de estudyos, el se ambezo i se akostumbro a las realidades de la sosieta i del dorredor akademiko i el tiempo ke esto tomo i entendyó ke si no se lavora duro i sistematikamente no es posivle de adelantar. Ademas el partajo sus eksperyensas de vida kon los estudiantes.
Por la peryoda akademika de 2024-25, 16 estudiantes fueron eskojidos a resivir una beka de 5000 shekels i siertos de eyos prezentaron sus lavoros akademikos i uvo unos ke dieron resitales de muzika.
Ansina se termino la seremoniya de la distribusyon de las bekas en una atmosfera kayente ke fue kreada grasias a la posesión komun de la kultura sefaradi i en mizmo tiempo la eskucha de muzika de un violon solo i de un koncherto a traverso un filmo.
