Keridos Lektores,
Oy kero avlar del estado psikolojiko de la persona en el otonyo. Ay personas ke se atristan en esta sezon porke los dias largos, klaros, kayentes del enverano, ya estan kaji para terminarsen, el panorama de la natura ke es ekstravagante en enverano, empesa a ariskureserse avagar avagar, komo las ojas de los arvoles ke son vedres, se azen amariyas, las flores multikolores se enklinan verso la tyerra, la kolor de la natura troka enteramente i se aze maron, djusto komo los korasones de siertas personas, siguramente los aedados ke son mas abatidos de pensar al invyerno yelado, ariskuro i asolado.
En el 19en siglo, los romantikos komo “Chateaubriand” pensavan i dizian ke davan dos enveranos para un otonyo. Porke es la sezon de kerensya, de amor, esperansa, tristeza i espartisyon.
Aser ke, el otonyo es una sezon de aunamyento, de adjuntamyento para mi. Es el tyempo de la unyon, de la solidaridad, de la ahadut de la famiya.
Estamos bivyendo en un tyempo muy moderno, muy diferente de muestra manseves. Los mansevos estan lavorando, viajando i no keren vinir mas a las izlas ande estan sus paryentes. Estan bivyendo una vida asolada kon el internet, telefon i sus amigos. La famiya para pueder estar kon eyos, estan trokando sus maneras de vida, i estan konformandosen a eyos kon kayades para ke no ayga problemes entre las madres, los padres i los ijos. En esta forma apartada, el otonyo i el invyerno son las sezones de la unyon de toda la famiya.
En septiembre es la fyesta Rosh-Ashana ke para mozotros es el presipyo del anyo.
Las famiyas pasavan los yamim noraim en las izlas. Ma oy, todos los grandes de las famiyas se estan indo allado de sus ijos i inyetos, i las sinagogas de las izlas estan kon poka djente.
Rosh-Ashana es el empesijo de un anyo ke esperamos, va ser yeno de echos buenos, salud, prosperidad, paz, repozo, reushita, refua i otras kozas buenas para todos entornados de amista.
En Rosh-Ashana toda la famiya se adjunta para fyestar este dia santo, las granmamas, los granpapas, las madres, padres i ijos, ijas, inyetos, kosfuegros, komen, avlan, riyen, kontan konsejikas i pasan una nochada maraviyoza.
La kontentes se melda de las karas de los mas chikos fina los mas grandes.
En oktobre vyene Kipur, el dia de demandar pardon al Dyo, de los yerros ke izimos durante el anyo, de los korasones ke ofendimos de muestros amigos, de las palavras negras ke dishimos a muestro entorno, esto todo se pardona kon las orasyones, kon los rogamyentos al Dyo.
Antes i despues de la fyesta, la famiya se auna en una kaza, i todos endjuntos toman plazer de esta unyon.
Yo penso ke malgrado ke estamos bivyendo kon muestros keridos ijos, ijas en la mizma kaza komo pansyonaryos, eyos ya se ambezaron las tradisyones, los uzos de muestra famiya i en el avenir lo van a realizar kon sus famiyas.
Kuando las fyestas se aserkan, ya empesan a demandar, ande vamos a estar, ande mi nono, nona, tio, en muestra kaza? Esto mostra ke, i eyos estan asperando estos dias santos i muy emportantes para pueder arrekojermos.
Lo ke no keren, es tomar responsabilitas.
Keridos Lektores, “Shana Tova u Meusheret” kon sanedad, parnasa tova i pas en el mundo entero kon todos djustos, AMEN…
