Es la semana pasada, diya de martes la tadre ke todos los radios i los postos de television anunsiaron un siber atake ke se realizo en el Liban. Kreo ke es el Mossad i los Israelianos ke organizaron este atake. Dospues de este siber atake, serka de tres mil militanes del Hizbullah fueron atakados kon sus instrumentos de mesajes. No se si vos akodrash! 30-35 anyos antes antes del telefono mobil, mizmo antes del telefono ke se uzava en las arabas, aviya un instrumento kon el kual era posivle de resivir mesajes. Eran los medikos, los avokatos, los komisyonaryos; los ke no teniyan botikas ke empleavan este instrumento. Los militanes del Hizbullah se espantaron de los telefonos mobiles porke los Israelianos reusheron a matar syertos lideres del Hizbullah kon los telefonos mobiles. I era posivle de sintir lo ke se avla kon los telefonos mobiles.
Este siber atake fue notado komo el siber atake el mas grande asta agora en la istoria. 3.000 personas fueron atakadas. I uvo mas de 12 muertos i syenes de personas ke pyedreron syertos de sus organos. En los ospitales en Beyrut i mizmo en otras sivdades ay syenes i syenes de personas ke estan feridas. Mizmo el ambasador Iraniano ke empleava el instrumento de los militanes del Hizbullah fue atakado, i en primero disheron ke pyedro uno de sus ojos. Mas de dyes doktores iranianos vinyeron immediatamente al Liban. Un diya dospues los eksperes militares dyeron sus ideas. Los instrumentos ke tyenen una marka del ekstrem oriente fueron fabrikados en la Ungaria. Agora estan avlando si los Israelianos metieron unos kuantos grames de eksplosivos en estos instrumentos durante la fabrikasion. Reelmente este akto fue un evenimyento ke dingunos vieron asta agora. A la fin los militanes del Hamas tuvyeron mas de 35 muertos i serka de 3.000 feridos. Kreo ke fue un akto ke dyo un danyo mas emportante ke unas kuantas bombas.
Avlando sovre este sujeto, diya de myerkoles kuando los militanes estavan realizando los funerales de sus muertos, esta vez un segundo siber atake fue realizado esta vez para las radios sin kable ke empleavan los militanes. Esta vez 3 otras personas fueron matados kon la eksplozion. No se si los instrumentos eran fabrikados en la mizma fabrika.
Vemos ke mizmo las maneras de gerra estan trokando en esta era. I los aviones i tankes no tyenen mas la mizma importansa. Ay muevos sistemes i maneras para atakar a sus enimigos.
Yo va ogurar PAS en el Medio Oriente.
