El selebro biologo E.O. Wilson estuvo diziendo ke devemos eliminar las relijiones porke las relijiones estan metiendo obstaklos delantre del progreso del umano.
En una entrevista kon la revista New Scientist, Wilson estuvo avlando sovre su livro dalkavo, ‘La sinyifikasion de la egzistensia umana’. En este livro, Wilson esta kestionando la relijion.
"Ande se esta indo muestro jenero?". Wilson esta diziendo ke estamos inyorando indisios de la siensia, i estomos aziendo danyo a la siensia por modo de la relijion.
“Todas las ideolojias i las relijiones tienen sus propias repuestas a las grandes kestiones, i kada relijion tiene su repuesta ke las otras relijiones no estan akseptando. No emporta tan jeneroza, o yena de amor ke seyga, dinguna relijion no esta akseptando las repuestas de las otras kreensias".
Wilson esta diziendo ke el no es un ateisto, ma el esta eksplikando: "Yo so sientifiko".
"Puedo dizir ke so agnostiko porke so sientifiko. Ser agnostiko kere dizir ke nunka puedemos saverlo. Si es ansina, deshalo. Las personas, en el mundo entero, tienen una fuerte tendensia de demandarsen si estan segidos por un dio o no. Kada persona kere saver si van a tener una otra vida o no. Estas son las kozas ke estan uniendo la umanidad’.
“Estos son los puntos flakos de las personas, i esto es la razon del nasimiento de las relijiones. En los Estados Unidos, por egzempio, si keres tener sukseso en la politika, kale ke deklares tu relijion, mezmo si esta relijion es ekstranya. Yo esto diziendo, por el bien del progreso de la umanidad, lo mijor ke puedemos azer, va ser aminguar, o asta el punto anular las kreensias relijiozas. Ma siguro no eliminar el dezeyo de topar la verdadera repuesta a estas kestiones.
Avlando sovre el futuro de la umanidad, Wilson esta diziendo ke el mundo de los bivos, va vinir a un punto ke va peryer el ekilibro.
“I kuando esto va afitar, todo se va derrokar".
