El almaryo de la kamareta de echar esta azyendo un bruido terible kada vez ke esta pasando un otobus afuera en la kaye. Enfasyada de este bruido, la mujer de la kaza yamo al marangoz ke venga para areglar el almaryo.
A penas vino el marangoz, ya paso un otobus i el almaryo ya empeso a azer su famozo bruido terible. El marangoz egzamina el almaryo i pensa ke el bruido deve vinir de aryento del almaryo i dize a la mujer: “yo va entrar aryento del almaryo antes ke pase un otro otobus para ver de ande vyene este bruido”.
En este momento entra el marido a kaza kon grande adjele, va a la kamareta de echar, avre el almaryo para avrir la kasha i ve el marangoz asentado en el almaryo. Kon grande birra le demanda “Ke bushkas aki, ke estas azyendo en el almaryo?"
El marangoz le responde “No se si me vas a kreyer si te digo ke esto asperando un otobus!!!!!”
